UN hotuin Burundi a tlawh

UN Secretary-General Ban Ki-moon chuan Burundi rama tualchhung buaina thleng mek chinfel dan kawng zawng turin a tlawh a, a cham chhungin President Pieere NKurunziza leh politician dangte a kawm ang.

Burundi Foreign Minister Alain Nyamitwe chuan sorkar chuan buaina chinfel a nih theihna atan inbiakna neih a duh a, mahse inbiaknaah hian thlan bik tlemte chauh ni loin Burundi mipui aiawh a tam thei ang ber an tel tur a ni, a ti.

Central Africa ram, Burundi tualchhung buaina hi kum 2015, April thla aṭanga inṭan a ni. Kum 2005 aṭanga President dinhmun chelhtu, Pierre Nkurunziza chuan nikum April 25 khan a term thumna atan President chuh leh a tum thu a puang a, mahse hei hi eptu party te bakah kohhran leh civil society chuan dodalin, an ram danpui kalh a nih ti sawiin an dodal zui a ni. President Nkurunziza dodala nawrh huaihawt sorkarin a khap zui a, Jun thla laihawl vel khan sorkar chuan sipai chakna hmangin nawrh huaihawtte hi a bei let a, mi 80 velin an thihphah a ni.

Eptu lamten nasa takin dodal mah se, nikum July thla khan President thlangin Nkurunziza hi thlan tlin leh a ni a, mahse eptu pawlte chuan inthlan hi an boycott a, president thar pawh hi an pawm lo tih a sawi. Tualchhung buaina hian ziaawm lam a pan thei lo a, eptu leh sorkar lamte hi an la inbei chhunzawm reng a ni. Buaina chhuak vanga thi hi mi 400 an tling tawh a, himna zawngin mi 230,000 vel chu ram pawn lamah an tlanchhe tawh bawk.