Hamas nena indo leh turin Israel a inpeih : Defence Minister

Israel Defence Minis-ter Moshe Ya'alon chuan,"Palestinian firfiak pawl, Hamas nen Gaza Strip-a indo leh a ṭul a nih pawhin Israel chu a inpeih a ni" a ti.

Chanchin thar la-khawm-tute a kawmnaah he thu hi sawiin, Ya'alon chuan, kum 2014 kum-tawpa Israel leh Hamas indona a tawp hnuah khan an la inkah chhunzawm leh lo niin a sawi a, mahse Hamas-te chuan rocket hmanga inthuam chak an tum mek niin a sawi.

Minister chuan Hamas-te chuan rocket an enchhin fo thu leh, Israei beihna turin lei an verh thu a sawi bawk. "Engtikah emaw chuan chhim lama bialah inbeihna thleng thut thei a ni a, hemi atan hian kan inpeih a ni" a ti.

Kum 2014-a Israel leh Hamad indo ṭum khan Israel mi 70 chuang leh, Palestinian 2,000 chuang an thi a ni. Indona a tawp hnu hian rocket hmangin Israel chhim lam beih a ni fo a,hei hi Gaza Strip-a Islam firfiak pawlte tih niin sipaite chuan an sawi.

January thla aṭang khan Hamas hian kum 2014 indo laia Israel sipaite an leiverh an tihchhiat sakte chu an thuam ṭha leh ṭan nia sawi a ni. Indo lai hian Israel chuan Hamas ho leiverh 32 zet an hmuchhuak a, heng leiverhte hi Israel ram chhung luh rukna atana an hman a ni.