Nepal thlawhtheihna tlaah mi 23 an thi

Tata Air thlawhtheihna, Twin Otter aircraft chu nimin khan Nepal ram khawthlang lam, Pokhara aṭanga Jomson pana a thlawh laiin chin hriat lohin a awm a, hun eng emaw chen an zawn hnuah tlhawhtheihna tla hi an hmu ta a ni. Thlawhtheihnaaa chuang, thawktu mi pathum leh khualzin 21 te chu an vaiin an thi a ni. Thi zingah hian naupang pahnih an tel a, China leh Kuwait ram mi pakhat ve ve an tel bawk.

Pokhara khua hi Nepal khawpui Kathmandu khawthlang lam km 200 vela hlaa awm a ni a, Jomson hi a hmarlama awm niin, Himalaya tlang lawn tum zinga tam takin an bul ṭanna atana an hmang thin.

Pokhata leh Jomson inkar hi thlawhtheihna hian minute 20 vel chauh hun hman a ni a, an inkarah hian ṭum lailawkna tur hmun pawh a awm lo.

Nepal aviation industry hian safety record a nei chhe hle a, hei vang hian kum 2013 khan European Union chuan Nepal airlines-te chu an service a lo khap tawh a ni.

Nepal rama thlawhtheihna a ṭum hmasak ber chu kum 1949 a ni a, hemi hnu hian chetsualna hi ṭum 70 chuang a thleng tawh a, mi 700 chuangin nunna an chan tawh a ni.

Nepal sipaite chuan thlawh-theihna hi chin hriat loha a awm thu hriat a nih veleh a zawng turin helicopter pathum an tirchhuak nghal a ni. Thlawhtheihna tlak chhan hi hriatchian a la ni lo.