Israel PM-in Africa ramte thawhpui tiam

Israel Prime Minister Benjamin Netanyahu chuan firfiaka chetna thleng doletna kawngah Africa ramte chu an thawhpui dawn tih a sawi.

Israel ram tlawha zin, Kenya President Uhuru Kenyatta nen meeting an neih hmain Netanyahu hian he thu hi a sawi a, "Islam firfiakte beih let turin Israel chuan Africa ramte chu thawhpui a inhuam reng a ni" a ti. Africa ramte chuan firfiakte beihlehna kawngah Israel chu thawhpui ram ṭha tak a ni tih an hriat belh zel a ni, a ti.

Kenyatta hi kum 22 chhunga Kenya President zinga Israel ram tlawh hmasa ber a ni a, Israel leh Kenya ram thawhdunna ṭha tak an nei thei chu lawmawm a tih thu a sawi. Water resource managment, fishery, education, technology leh science lama thawhdunna nghet zawk neih dan kawng a zawng dawn tih a sawi bawk.

Kum 1976 khan Kenya leh Israel hi security lamah an thawkdun tawh a, Palestinian helhoin thlawhtheihna an hijack ṭuma Israel-in chhanchhuah hna a thawhna, Operation Entebbe-ah khan Kenya chuan Israel hi a lo pui tawh a ni.

Ram pahnihte hian kum 50 chuang zet chu palai an lo intir tawn tawh a, security operation bakah technology leh humanitarian lamahte an thawkdun a ni.

Kenyatta chuan Israel leh Kenya chuan democracy ram, mitin ten an ngaihdan zalen taka an sawichhuahna leh sakhaw zalenna ram a ni a, hei hi ram pahnihte suihzawmtu pawimawh tak pakhat a ni, a ti.