Israel-Hamas war : Darkar 24 chhungin Israel-in Hamas hmun 320 an bomb

Israel sipaite chuan Gaza Strip-a Hamas pawl hmun hrang hrang air strike hmangin an beih chhunzawm zel a,nimin khan darkar 24 chhungin an target 320 an bomb tih an sawi. Heng zingah hian Hamas fighter-te awmna tunnel bakah, command leh lookout post-te pawh an tel.

Palestinian media-te chuan Israel lam hian Gaza Strip hmun laili lai leh hmarlamte an bitum mek niin an sawi. Israel defence minister chuan Hamas laka beihpui an thlak chuan thum thleng a awh thei tih sawiin, "A tawpah chuan Hamas hi an awm tawh lo ang," a ti. Pathianni zana airstrike an neihah hian Hamas senior commander, Muhammad Katamash a thi nia hriat a ni.

Israel sipaite hian khawmual sipaite nen Gaza Strip luhchilh an ni dawn tih sawi mah se, a hun tak erawh an la sawi lo. Mahse Gaza ramri-ah tank leh sipai ṭhahnem tak erawh a chhawp lawk vek tawh a ni.

Nimin kha Israel leh Hamas-te indo ni 17-na a ni tawh. Chhim lamah Hamas nena ngawrh taka an indo mek laiin, an ram hmar lamah Lebabon-a Iran thlawp, Hezbollah hel pawl chuan Israel hi an bei ve mek bawk. Nimin khan Israel chuan Lebanon rama Hezoballah cell pahnih chu indo thlawhtheihna hmangin a kap. Pakhat hi ramri bula Israel khua Mattat aṭanga km 13 vel chauha hlaa awm niin, pakhat zawk hi Shebaa Farma area-a awm a ni.

Hezoballah chuan Israel-in a kahnaah hian an fighter pakhat a thi tih an sawi.

Israel prime minister Benjami Netanyahu chuan Lebanon ramri bula Israel sipai awmte tlawhin, Hezbollah te a vau zui bawk. "Hezbollah hi indonaah an rawn tel ve a nih chuan, Second Lebanon War kha an ngai zawk hle ang. An nuna an thil tihsual lian ber tur a ni ang. An ngaihtuah phak bakin kan che dawn a ni," a ti.

Biden-a'n khawthlang ram hotute sawipui

US president Joe Biden chuan Israel leh Hamas-te indo mek chungchang chu Pathianni khan Britain, Canada, France, Germany leh Italy ram hruaitute a sawipui. Heng ram hruaitute hian Israel ram an thlawp thu pawh an sawi nawn leh a, hemi rual hian indo mekte chu international humanitarian law zawm a, Israel pawh civil mite himna ngaihtuah turin an ngen.

US secretary of state Antony Blinken chuan Iran inrawlhna avangin Israel-Hamas war chu a zualkai phah US chuan a ring tih a sawi ve bawk. America mi leh an sipaite bitum an nih chuan US sorkar chu chhang let turin a inpeih reng tiin a vau zui.

Chhawmdawlna phurtu luh belh remti

Egypt-in Gaza Strip mipuite tana chhawmdawlna thawn luh a nih theihna atana Gaza nena an inrina, Rafah border crossing hawn a remtih hnuah Inrinni liam ta khan truck 20 an lut tawh a, Pathianni khan truck 14 an luh belh leh bawk.

Israel chuan US leh midangte ngenna avangin Gaza Strip-ah chhawmdawlna thawn luh belh a remti leh tih Pathianni khan a sawi.

United Nations chuan Gaza-a chhawmdawlna thawn luhte hi mipuite mamawh phuhrukna turin a la beitham hle tih a sawi a ni. Mipui mamawh ang pe tur chuan chhawmdawlna phurtu truck hi ni tin 100 vel an tlan luh ziah a ngai a ni, a ti.

Egtyp post kap fuh palh

Pathianni zan khan Israel military tank chuan Kerem Shalom area-a ramri bulah Egypt sipaite post chu a kap fuh palh.

Israel Defence Force (IDF) chuan he thil thleng hi tihpalh liau liau a ni tiin pawi an tih thu a tarlang a, thil awmdan pawh an chhui chiang nghal dawn tih an sawi.

Egypt sipaite chuan thil tihchhiat lian tham a nei lo niin an sawi a, Israel lam pawhin tipalh a nih thu pawh an hrilh nghal tih an sawi bawk. He thil thleng vang hian Egypt ramri kaltlanga Gaza-a chhawmdawlna thawn luh chu a bahlah phah dawn lo tih an tarlang bawk a ni.