Israel-Hamas war : Hamas-te'n an mi hren 2 an chhuah leh

Palestinian firfiak pawl, Hamas chuan Thawhṭanni khan an mi hren zinga mi pahnih an chhuah leh. Kar liam ta khan American hmeichhe pahnih an lo chhuah tawh bawk.

Thawhṭannia Hamas-te'n an chhuah hi Israel mi ve ve, hmeichhe pahnih an ni. Kum 85 mi Yocheved Lifshitz leh kum 79 mi, Nurit Cooper-te an ni. An pasalte erawh Hamas-te hian an la hreng a ni. Qatar leh Egypt aiawhte nena inbiakna an neih hnuah, Gaza leh Egypt inrina, Rafah border-ah chhuah an ni a, Israel sipaite kuta hlan niin damdawi in lamah an hriselna dinhmun enfiah tura hruai nghal an ni.

Media report ṭhenkhat chuan Hamas-te hian an mi hren zinga mi 50 an chhuah leh dawn niin an sawi. Red Cross lam aiawhte chuan heng mite hruai chhuak tur hian Gaza lam an pan niin an sawi.

Israel chuan October 7-a Hamas-te'n Israel an beih ṭuma an mi mante chu mi 222 an ni tih a sawi. Israel sipaite chuan Hamas-te tichhe vek turin nasa zawka beihpui thlak turin an inbuatsaih mek tih an sawi. Hemi chungchangah hian US president hlui Barack Obama chu ṭawng chhuakin, mihring nunna ngai pawimawh loa Israel sipaite chetna a thlen chuan nghawng let a nei ngei ang, a ti.

Israel sipai thupuangtu Daniel hagari chuan Hamas nena an indo mekah, sipaite chu stage dawt leh kal turin an inpeih tawh hle tih a sawi a, thuneitute lam thuchhuak chiah an nghak tawh tih a sawi. Israel chuan Middel East-a US thil lo tawn tawh aṭangin thil tam tak a zir a ni, a ti. Tun ṭum indonaah hian Hamas hian Israel mi 1,400 chuang a that tawh a, kum 75 chhunga Israel-in beih a tawhna nasa ber a nih thu a sawi bawk.