France President-in Israel a tlawh

Israel-Hamas indona a thlen hnuah, US president Joe Biden leh UK prime minister Rishi Sunak-te'n Israel an thlawpna lantirin Israel ram an tlawh tawh a, nimin khan France president Emmanuel Macron pawhin a tlawh ve leh.

President Macron hian nimin khan Tel Aviv a thleng a, Israel prime minister Benjamin Netanyahu hmuin, Israel-Hamas indona thleng mekah Israel ram an thlawp thu leh, Islamist firfiakte a beih letna kawngah Israel chu an thlahthlam dawn lo tihte a hrilh. Hemi rual hian Israel-in phuba a laknaah, civil mite himna ngai pawimawh turin a ngen bawk.

France President hian nimin vek khan Jerusalem-ah Israel president Isaac Herzog leh opposition leader - Benny Gantz leh Yair Lapid-te pawh a hmu bawk a ni.

October 7-a Hamas firfiakte'n Israel chhim lam an beiha mi tam tak an thah zingah khan France mi 30 an tel a, France mi pakua chin hriat lohin an la awm mek bawk.