Pakistan PM hlui Sharif-a court-ah inlan

Pakistan prime minister hlui leh eiruk thubuaia thiam loh chantir tawh, Nawaz Sharif chu an rama a kir hnuah, nimin khan Islamabad-a court hmaah a inlan.

Nawaz Sharif hian eiruk thubuaia thiam loh chantir a nih hnuah, kum 2019 khan damdawi lam inenkawl turin United Kingdom a pan a, a awm zui ta a ni. Imran Khan-a prime minister a nih lai khan court chuan vawi tam tak Pakistan-a kir turin a hriattir a, mahse, a kir duh lo.

Pakistan PM aṭanga paihthlak tak, Imran Khan man a nih hnuah kar liam ta khan court chuan a thubuai zawng zawngah Sharif hi bail a phalsak a, Pakistan a thlen huna man a nih mai theih lohna tura hum a nih tak avangin kar liam ta khan an ramah hian a kir leh ta a ni.

Nimina Islamabad court-a a inlan dawn hian amah thlawptu mi tam tak an pung khawm. Sharif hian thiam loh chantir a nihna pahnih chu Islamabad High Court-ah a appeal bawk. Nakkum January thlaa an ram inthlanpui neih turah a chuh leh ve leh theihna turin kawng a zawng mek.

Hetih lai hian PM hlui Imran Khan chu an ram thuruk tiput rua puh a nih chungchangah Thawhṭanni khan thubuai siamsak a ni. He thubuaiah hian thiam loh chantir a nih chuan hremna na tak pek theih a ni ang a, inthlan a chuh tum thlengin a nghawng thei dawn a ni. August thla khan eiruk thubuaiah thiam loh chantir niin inthlan chuh thei lo turin hrem a lo ni tawh a, mahse, he hremna hi a hnuah an sut leh a ni.