UN-in Syria mite chhawmdawlna tur thlak
United Nations chuan Syria khawchhak lama Islamic State (IS) firfiak pawlten an beih mek bial chhunga civil mite chhawmdawlna tur chu a ṭum khatna tan thlawhtheihna hmanga thlak a nih thu a sawi.
UN aid chief Stephen O'Brien chuan Security Council chuan Syria sorkar kuta awm, Deir al-Zour khuaa chengte chhawmdawlna tur ton 21 chu Nilaini khan thlak a nih thu a sawi. Chhawmdawlna an thlak hi a mamawhte hnenah sem nghal a ni tih report pawh an dawng niin a sawi bawk.
UN chuan Deir al-Zour-ah hian firfiak leh sipaite inbeihna vangin civil mi 200,000 vel chu khaw chhungah hualbehin an awm mek niiin a sawi. Hmun him lam pana an tlanchhiat theih loh avangin an dinhmun pawh a ṭha lo hle a, ei tur mumal an neih tawh loh vangin rilṭama thi pawh eng emaw zat an awm niin UN report chuan a tarlang.
Kar hmasa khan khaw panga dang hualbeh meka chengte tan ei tur leh nitin khawsak mamawh chu truck 100 chuang hmangin thawnluh a ni tawh bawk.
World Food Programme chuan Syria mi chhawmdawl ngaite
ṭanpuina pek tur hi thlawhtheihna hmanga thlak hi a harsat avangin motor hmanga thawn luh ngei a duh thu a sawi. Thlawhtheihna aṭanga thlak chuan a thlakna tur hmun bakah, mipuite hnena sem chhuah leh danah harsatna a awm niin a sawi. Mahse khaw chhung luhna kawng hrang hrangte dan vek a nih avangin chhawmdawlna hi pek dan kawng dang a awm tawh lo a, hei vang hian UN pawhin thlawhtheihna aṭangin a thlak ṭan a ni. UN chuan Syria rama sorkar sipai leh helho inbeihna bial chhung-a mi 480,000 vel an tangkhang mek niin a sawi a, mi maktaduai li chuang zet chu tlawhpawh mumal theih lohin an awm bawk a ni, a ti.
Hetihlai hian Syria ramah IS firfiakten ram lak belh tuma pawikhawihna an thlen reng bakah, Syria sorkar laka hel, eptu leh sipaite an inbei reng bawk. Mahse US leh Russia hmalaknain, Syria sorkar leh eptute hian inkahhai puan an remti a, he inremna hi Inrinni zan zanlai aṭanga hman
ṭan tum a ni.
Syria sorkar chuan eptute nena inremna an siam chu tihhlawhtlin ngei a tum thu a sawi a, hemirual hian IS, al-Nusra Front leh an zawmpui firfiak pawl dang lakah erawh beihpui a thlak chhunzawm reng tur thu a sawi.