Beijing-ah billionaire tam ber

Khawvela khawpui hrang hrang zingah Beijing khawpui chu mi hausa tawntaw, billioniare tamna ber khua a ni.

China-a hmunpui nei, Huran firm-in kum nga kalta chhunga mi hausate thil neih leh hausak dan zirchianna a neih hnua Global Rich List a tihchhuah tharah, Beijing hian New York lehpelin, mi hausa tawntaw tamna ber khawpu a ni ta a ni.

Beijing-ah hian billionaire 100 an awm a, New York-ah 95 an awm. China chuan US pelin, billionaire nei ngah ber ram a rawn ni thar bawk. Hetihlai hian hausa zual 10 zingah a tam ber chu America mi an la ni thung.

China ramah hian billionaire 568 an awm a, an zinga mi 90 chu tunhnaia rawn hausa tharte an ni. Beijing khawpui bikah hian nikum chhung khan billionaire hi mi 32 an awm thar bawk. US chuan billionaire hi mi 535 a nei.

China rama billionaire-te hausakna belhkhawm hi dollar trillion 1.4 a tling a, hi hi Australia ram GDP nena a intluk a ni. China rama mi hausa ber chu Wang Jianlin a ni a, a hausakna belhkhawm hi dollar tluklehdigawn 26 hu a ni. Mahse khawvel puma hausa ber chu America mi, Bill Gates niin a hausakna hi dollar tluklehding-awn 80 a ni a, a dawttu pawh America mi tho Warren Buffet niin dollar tluklehding-awn 68 hu a nei.