Cuba-in khuahkhirhna thlahdul

Cuba sorkar chuan an rama mi eptu member ṭhenkhat, zinchhuah khapna a siam chu a thlahdul.

Black Spring group member pasarihte chu sorkar policy kalh zawng an khawsak avangin sorkar chuan an ram chhuahsan thei lo turin a khuahkhirh a, mahse an khawsak dan an insiamṭhat avangin ṭum khat ṭheuh ram pawn lama an zinchhuah a phalsak dawn a ni.

US sorkar chuan Cuba sorkar hnenah an ram mi ṭhenkhat khuahkhirhna a siam hi hlip turin a lo ngensak tawh bawk.

Human rights organisation chuan Cuba sorkarin khuahkhirhna a thlahdul chu lawmawm a ti tih thu a sawi a, hetihlai hian eptu member-te chuan ṭum khat an zinchhuah phalsak an nih hnuah sorkar chuan hremna hi an laka lekkawh chhunzawm leh nghal a tum niin an sawi thung.

Kum 2003 kahn Cuba sorkar chuan sorkar kalh zawnga che, eptu member dapchhuah runpui a nei a, mi 75 a man. An zinga a tam zawk chuan Cuba ram chhuahsan an remtih hnuah kum nga liamtaah khan chhuah zalen a ni. Mahse mi 11-te chuan Cuba ram hi an chhuahsan ve duh lo a ni.

Cuba hian US nena an inlaichinna siamṭhat tumin hma a la mek a, hun rei tak hnuah ram pahnihte hian nikum aṭang khan palai pawh an intir tawn leh tawh a ni. US-in a ngen angin politics vanga man, mi 53 pawh a chhuah zalen tawh a ni. Mahse Cuban Commission for Human Rights and National Reconciliation chuan sorkar dodal zawnga chete chu a la man chhunzawm reng tih sawiin, nikum khan thla tin mi 700 chuang man an ni ziah niin a tarlang.