EU ram 10-in raltlan lut tur dan an remti

Europrean Union (EU) member ram 10-te chuan Greece-a raltlan lut, an ram chhunga luh chhawn leh tumte danna tur ruahmanna an siam. Hetihlai hian EU chuan Europe rama raltlan lut pung zel vanga harsatna an tawh cho chinfel dan kawng a la hre thei lo.

Raltlan luh tumte danna siam remtitu hi Austria bakah Balkan ram pakuate an ni. Heng ram 10-a foreign leh interior minister-te chuan Vienna-a meeting an neihah inremna hi an siam a ni.

Hetihlai hian Africa leh Asia khawthlang lam aṭangin indona leh retheihna avangin mi tam takin Europe hi an pan belh mek a ni. Raltlan tam zawk hian Greece an pan hmasa a, Greece aṭang hian Europe ram dangte an pan leh ṭhin.

Ram 10-ten inremna an siamah hian an rama raltlan, venhim ngai tak tak chauh luhtir phalsak an rel. Hei bakah hian raltlan chanchin leh nihna hriat ngai chin pawh an duang bawk. Hei bakah hian tunhnaia Germany leh Europe hmar lam pan tumten kalkawng atana an hman, Macedonia ram puih pawh an rel bawk. Austria interior minister Johanan Mikl-Leitner chuan Macedonia-in a ramri venhimna hna a kalpui meknaah pui turin police 20 thawn belh leh an tum tih a sawi. Croatia, Serbia, Slovenia, Czech Republic leh Hungary-te pawhin puih an tum thu an sawi.

Hungary sorkar pawhin EU-in a duan anga an ram raltlan lak luh tur chungchangah ram mipuite ngaihdan lak an tum tih a sawi.