Israel-Hamas war : Hamas-te beihna tihtawp chuan an mi hrente chhuah tiam

Hamas senior leader, Khaled Meshaal chuan Israel sipaite'n Gaza Strip-a Hamas hmun an beih an tihtawp chuan, October 7-a Hamas-te'n an mi man, civil mite chhuah zalen an nih tur thu a sawi.

Sky News-in a kawmnaah, Meshaal chuan Hamas-te'n an hren mek zinga 22 chu Israel sipaite beihpui thlaknaah an thi a, a tam zawk Israel mi an ni tih a sawi. Hamas-te'n an mi man leh tun thlenga an la hren mek zat erawh a sawi lang lo.

Meshaal chuan, "Netanyahu hian heng mite himna hi a duh tak zet a, European leh American-te pawhin an himna hi an ngai pawimawh a nih chuan, Israel-in Gaza Strip a beihna chu titawp turin an nawr a ngai," a ti. Israel sipaite'n Gaza Strip-a Hamas hmun an beihte an tihtawp chuan, Qatar leh Egypt bakah Arab ram dangte kaltlanga inbiakna neihpuiin, an mi hren mekte chhuah an nih theih dan an ngaihtuah dawn tih a sawi.

Hetih lai hian Israel Defence Force (IDF) chief of staff, Lt. Gen. Herzi Halevi chuan Israel sipaite chu Gaza Strip luhchilh turin an inpeih reng tawh tih a sawi ve thung. IDF hian Gaza Strip-ah lehkha thlakin, Palestinian civil mite chu Hamas-te'n an mi hren mekte chungchang kimchanga an hriattir theih chuan lawmman pawisa fai pek bakah, Hamas-te lak aṭanga venhim an tiam. Gaza civil mite chu WhatsApp, Telegram leh line dang hmanga be pawp turin an hriattir a ni.

Israel hian Hamas mi leh sa an mante thu an zawh fiahnaah, October 7-a Israel an beih ṭum khan Israel mi man a, Gaza-a hruai theite chu mi pakhat an manah USD 10,000 bakah apartment pek tiam an nih thu an sawi. A bikin naupang leh kum upa zawkte man tura hriattir an ni tih an sawi bawk. Official-te chuan an thu zawh fiah lai video pawh hi a tichhuak tawh bawk. IDF chuan Hamas senior commander-te chu an in lamah him taka ṭhuin, an mi leh sate chu Israel ram bei turin ralthuam nen an tir chhuak a ni tiin, rawng taka Israel beihnaa inhnamhnawih, firfiak zawng zawng chu dah bo vek an ni dawn tih an sawi nawn leh.

Israel-in UN hotu bang turin phût

Israel-Hamas indona thleng mek chungchanga United Nations secretary-general, Antonio Guterres thusawi dan chuan Israel a ti thinur hle a, UN hotu hi firfiaka chetna thlawpah puhin bang turin an phût.

UN Security Council high-level session-a thu a sawiah, Guterres hian Israel-in Gaza Strip-a beihpui a thlak mekah international law bawhchhiaah puhin, inkahhai puang thuai turin a ngen. October 7-a Hamas firfiakte pawikhawihna rapthlak tak thleng chu ngaihdam theih a ni lo tih a rualin, Israel-in phuba a laknaah Palestinian mipuite bitum lo turin a ti bawk. Hamas-te pawikhawihna thlen a dem thu a sawi rual hian , awmze nei loa rawn che chhuak ngawt an ni lo a, "Palestinian-te hian kum 56 chhung zet awpbeh an lo tuar tawh a ni," tiin a sawi. Hei hi Israel chuan a helh nghal hle a, Israel foregin minister Eli Cohen chuan rawn chhang nghalin, Israel rama Hamas-te pawikhawihna thleng avanga civil mi tam tak thi, naupangte thleng pawhin an zuah loh thu chu a rawn sawi chhuak zui ve nghal.

He thil thlen hnuah hian UN-a Israel ambassador chuan UN hotu chu bang tura an phût thu X-ah rawn sawiin, firfiakte pawikhawihna leh tualthahna thlente chu a pawmpui a ni, a ti.

Hezbollah hotu leh Hamas aiawhte inhmu

Lebabon-a firfiak pawl, Hezbollah hotu Hassan Nasrallah leh Hamas bakah Palestinian Islamic Jihad group aiawhte chu Beirut-ah an inhmu.

Hezbollah hotu hmu tura kalte hi Hamas deputy chief Saleh al-Arouri leh Islamic Jihad leader Ziah Nakhaleh te an ni. Hruaitu pathumte hian Gaza-a hnehna chan ngeina tura hma lak zel dan turte an sawiho niin Hezbollah al-Manar TV chuan a tarlang.

Israel leh Hamas-te indo mek karah, Hezbollah chuan Israel hmar lam an lo bei ve bawk. Israel prime minister Benjamin Netanyahu chuan Hezbollah hi a vau tawh a, Israel a rawn do ve a nih chuan an thil tih tawhah an tihsual lian ber tur a ni tih a hrilh. US secretary of defence Lloyd Austin pawhin Hezbollah chu Lebanon chhim lam aṭanga Israel a beihna titawp nghal turin a hriattir tawh bawk a ni.