South Carolina-ah Clinton-i a chak

November thlaa US President thlanna neih tur atana Democratic party-in South Carolina primary election a neihah, Hillary Clinton-i a chak.

Democratic party hian primary election ṭum li nei tawhin, Clinton-i hi hmun thumah a chak a, Senator Bernie Sanders chu New Hamsphire-ah a chak tawh bawk.

Sanders chuan Clinton-i hi lawmpuina a hlan a, hemirual hian party president chuha an inbeihna chu bul an ṭan chauh tih a sawi. Naktuk, Super Tuesday an tihah hian primary election hi hmun 11-ah neih a ni dawn a, heta ṭang hian party candidate ni thei tur chu a hriat thei ruak tawh rin a ni.

Clinton-i hian kum riat kalta khan South Carolina primary election-ah president ni ta, Barack Obama a lo hneh tawh lo a ni. Tun ṭumah hian mihang zinga a tam zawkin Clinton-i hi an vote a ni.

Republican candidate chuhtu zingah Donald Trump chuan hma a la hruai chhunzawm zel a, mipui ngaihdan lakah pawh a hma-hruaina hi a fal sawt hle a ni.

Nikum June thlaa politics luhchilh chauh, kum 69 mi, Donald Trump hian thlawptu a nei pung chak hle a, Super Tuesday-a Republican primary election, state 11-a neih turah pawh a chet ṭhat leh rin a ni. Trump hian sawisel hlawh tak tak thu a sawichhuak fo a, Mexico nena an inrina-ah daidanna bang siam a tum thu te, an rama Muslim mi luh khapna siam a tum thu a sawite chuan beihzui a hlawh hle. Tunhnaiah an ram mite lak aṭanga hna thawh tur tam tak chhuhsakah India, China leh Japan-te a puh a, US President atana thlan tlin a nih chuan hetiang thil hi a thlen tawh loh tur thu leh, an kut aṭangin hnate chu a lak kir sak leh vek tur thu a sawi.