China-ah Kristian pastor-te nupa hrem

Chian sorkarin Kristian biak In-a kraws intarte lakthlak sak a tumna dodaltu, Pastor Bao Guohua leh an nupui Xing Wenxiang-te chu kar kalta Zirtawpni khan dan kalh zawnga cheah puhin thiam loh chantir an ni.

Pastor Bao Guaohua hi dan kalha che, khawtlang nun tibuai zawnga thilti leh eiruknaa inhnamhnawiha puhin Zhejiang Province court chuan kum 14 tang turin a hrem a, a nupui chu kum 12 tang tura tih a ni bawk.

Court chuan Pastor-te nupa hian an kohhran mite chu sorkarin dan a siamte dodal zawnga petiton thehluh turin dik lo takin an khawm niin a sawi. Hei bakah hian kohhran member-te sum an thawhkhawm dollar 336,000 chu car leh an mimal thil leina atan an hmang niin a puh bawk.

Kum hnih kalta aṭang khan Zhejiang province chhungah hian biak Ina kraws intarte lakthlak hna hi kalpui ṭan a ni. He province hi Kristian tamna niin, biak-in pawh a tam hle. District thuneitute chuan biak-in kraws tar hi building code palzutna a ni tiin, lak thlak tir vek an tum a ni.