Zimbabwe President piancham lawm dan sawisel

Zimbabwe-a rorellai party, Zimbabwe African National Union - Patriotic Front (ZANU-PF)-in an ram President, Robert Mugabe-a piancham vawi 92-na a lawmsak dan chuan sawisel a hlawh hle. Mugabe hi ram hruai-tu lu ni mek zinga upa ber a ni.

Kar kalta Inrinni khan ZANU-PF hian President Mugabe piancham hi ropui takin a lawm a, a lawmna senso atan hian hian dollar 800,000 zet a seng ral nia sawi a ni. Hetihlai hian an ram mipui tam zawk chu ei tur mumal nei loin an ṭam mek a ni.

Robert Mugabe leh a nupui Grace-te hian, khawkhengin a tihbuai mek an ram chhim-chhak lama Masvingo khawpuia Great Zimbabwe monument-ah President piancham lawm tura mi sing tel kalkhawmte hmaah balloon 92 an chhuah.

Eptu pawl, Movement for Democratic Change (MDC) chuan Presidenty piancham ropui leh hautak taka lawm a ni chu sawiselin, a lawmna atana sum hmanralte chu ei tur tlachhama awm mek hnena sem turin vaimim lakluhna atan hmang se an duh zawk thu an sawi.

MDC MP Obert Gutu chuan, " Piancham ropui taka lawmna tur hian sorkar sum a hman bakah, ramchhunga khawkhenga vanga harsatna tawik nasa ber te awmna bialah ngei a la lawm zui a ni" a ti.

UN World Foor Programme chuan, Zimbabwe ram hian khawkheng a tawrh nasat avangin a thlai thar chhuah hi kum hmasa lam aiin a zahve vel zetin a tlahniam niin a sawi. Sorkar chuan tun thla tir lam khan ram mipui maktaduai thum vel chuan ei tur an nei mumal tawh lo nia sawiin, ṭanpuina dollar tluklehdingawn 1.6 dawn pe turin a lo ngen tawh a ni.