China-in pension kum tihsan a tum

China sorkar chuan kum 2017-ah hnathawkte pension kum bithliah chu tihsanna tur siam a tum.

Ministry of Human Resources and Social Security-a researcher Jin Weigang chuan, "Ruahmanna thar hi kum 2017-ah siam tum a ni a, kum nga chhung vel inbuatsaihin 2022-ah a taka hman tum a ni ang" a ti.

China ramah hian nau piang thar an tlem a, ṭhalai hnathawk rual an pung chak lo a, hetihlai hian kum upa leh hnathawk thei lo an pung chak hle thung. Nikum khan hnathawk rual, kum 16-60 inkar chu a kum hmasa lam aiin maktaduai nga velin an kiam leh tawh a, hei hi a zawna kum li an kiamna a ni tawh.

China rama hna-thawktu pension kum bi-thliah hi sorkar hnaah mipa tan kum 60, hmeichhe tan kum 55 a ni.