Israel-Hamas war : Gaza-ah Israel tank an lut

Israel sipaite chuan Hamas firfiakte hmun bei turin Ningani zan khan Gaza Strip-ah tank an tir lut.

Israel Defence Force (IDF) chuan airstrike hmangin hun eng emaw chen Gaza Strip-a Hamas-te hmun an bei tawh a, khawmual lam aṭang pawha an beih thuai tur thu an lo sawi tawh a ni.

Tank-te hi Gaza hmar lamah an lut a, target ṭhenkhat an beih hnuah Israel lamah an kir leh phawt tih sipaite chuan an sawi. Gound invasion ang takin an la kalpui lo a, target ṭhenkhat an beih chu a stage dawt leh atana an lo inbuatsaihna a nih thu an tarlang. Prime minister Benjamin Netanyahu chuan ground war nei tura an inbuatsaih mek thu a sawi.

Nilaini khan Israel hian airstrike hmangin Hamas-ho hmun 250 vel an kap leh. UN humanitarian coordinator chuan Gaza khawi hmun mah chu a him tawh lo niin a tarlang.

Gaza Strip-a health ministry chuan October 7-a Israel nena an indo aṭang khan Palestinian mi 6,500 vel an thi tawh a, an zingah hian naupang eng emaw zat an tel tih an sawi. Hetih lai hian US president Joe Biden chuan Hamas ministry-in thi a sawi zat hi a rintlak chiah a rinawm lo niin a sawi ve thung.

UN chuan Gaza-a hospital 35 zinga 12-te chuan fuel an neih tawh loh avang leh, building-te a chhiat tel avangin khar a ni tawh tih an sawi. Hamas nena an indo hnuah Israel hian Gaza ramrite kharsakin, ei tur, tui leh mamawh dangte lak luh theih lohin a dang a ni. Mahse US President Biden-a'n inbiakna a neihpui hnuah Egypt chuan Gaza Strip nena an inrina, Rafah border crossing hawn a remti a, chhawmdawlna phurtu truck pawh eng emaw zat luhtir an ni tawh. Mahse truck lut zingah hian fuel phur erawh an awm lo.

Chhawmdawl hna thawktute chuan fuel awm loh chuan medical equipment, water plant leh ambulance-te pawh hman theih lohin an awm thuai dawn a, thi pawh an pun phah dawn niin an sawi.