Pakistan-in document nei loa pem lutte thawn kir tum

Pakistan sorkar chuan document pawimawh nei loa an rama pem lutte thawn kir tumin ruahmanna a siam mek. Thawn kir a tum zingah hian Afghan mi maktaduai 1.7 an tel.Dan loa pem lut, thawn kir turte dahna tur hian deportation centre siam mek a ni.

Thuneitute chuan November 1 aṭangin an rama pem lutte enfiah hna hi an thawk dawn a, registration ti lo emaw, document nei lo emaw te chu manin, centre-ah hian dah zel an ni ang. Hetih lai hian pem lut zingah mahni duh thua an rama kir turte chu sorkarin puih a tiam thung. Sorkarin hriattirna a tihchhuah hnuah hian Afghan mi 60,000 chu an ramah an kir tawh.

Pakistan caretaker interior minister Sarfraz Bugti chuan hun tiam an siam chu an pawtsei dawn lo tih a sawi a, thawn kir tura deportation centre-a dahte chu ṭha taka enkawl an ni ang, a ti. Pakistan an chhuahsan dawn hian Pakistan rupees 50,000 thleng an ken phalsak an ni dawn tih a sawi bawk.

Kum 1979-1989-a Soviet-Afghan war lai khan Afghan mi maktaduai tel chu Pakistan-ah hian an tlanchhia a, kum 2021 August thlaa Taliban-te'n Afghanistan-a thuneihna an chan hnuah khan mi tam tak Pakistan lamah an tlanchhe leh bawk.

Pakistan chuan dan loa an rama pem lutte dap chhuah hna a thawhah Afghan mite a bitum bik lo tih a sawi a, an rama Afghan raltlan in-register, mi maktaduai 1.4 velte chu an thiltih hian a nghawng tel dawn lo tih an sawi. US leh UN chuan Pakistan sorkar hnenah a thiltih tum hi ngaihtuah ṭha turin an ngen fo a, an kaltlangpui a nih chuan human rights palzutna a nih bakah, chhungkaw tam tak ṭhen hran an ni dawn a ni, an ti.