US-a inpawng kahna thlengah mi 22 an thi

US, Maine state-a Lewiston khuaah an ram huna Nilaini zan khan bar leh bowling alley-ah inpawng kahna a thleng a, mi 22 an thi a, hliam 60 vel an awm bawk nia sawi a ni. Police-te chuan nimin thleng khan pawikhawihtu hi an la zawng mek a ni.

Police-te chuan inpawng kahna thlenna hmun hi Mollison Way-a bowling alley, Sparetime Recreation leh Lincoln Street-a Schemengees Bar & Grille Restaurant a nih thu an sawi. Pawikhawihna thlentu hi kum 40 mi, Robert Card nia sawi a ni. US Army Reserve-a firearms instructor hlui, tun hnaia mental health facility aṭanga chhuak nia sawi a ni bawk.

Maine official-te chuan Card hian ralthuam a kawl avangin midang tan pawh a hlauhawm dawn tih sawiin, police za rualin an zawng mek tih an sawi. Card-a motor hman hi Lisbon-ah hmuh a ni tawh bawk.