Baghdad-a bomb puakah mi 70 an thi

Iraq khawpui Baghdad-ah Pathianni khan ṭum hnih thihchilh bomb a puak a, mi 70 an thi.

Police-te chuan bomb tipuaktute hi bike-ah an chuang a, Shi'ite district-a Sadr City-a mobile phone bazar-ah an tlan lutin, an bomb pai chu an tipuak ta niin an sawi. Bomb puak vang hian mi 100 chuangin hliam an tuar bawk.

Pawikhawihna a thlen hnu hian Islamic State (IS) firfiak pawl chuan bomb tipuaktu an nih thu internet-ah an tarlang nghal a, "Kan rinna dodaltute chu kan beih chhunzawm zel dawn" tih an tarlang.

Hetihlai hian Iraq khawthlang lam, Anbar province-ah chuan US kaihhruai ṭangrual ramten IS lakah beihpui an thlak chhunzawm reng a, sipaite hian Mosul khawpui chu firfiakte lak aṭanga lak let tumin an bei mek a ni. IS hian an ram lak pawn lamah pawikhawihna an la thlen fo a, a bikin Shi'ite muslim te tamna bial an bei tel fo a ni. Kar kalta Ningani pawh khan Baghdad-a Shi'ite ho mosque-ah thihchilh bomb an tipuak a, mi 15 an thi.

Iraq Prime Minister Haider al-Abadi chuan security force-ten IS te hi an hneh chhoh zel avangin firfiak pawl hian phuba lakna atan Baghdad hi an bei ta niin a sawi.

Pathianni zing khan Abu Ghraib tan-ina security force duty te chu thihchilh bomb leh silai hmanga beih an ni bawk a, sipai 17 an thi. Official-te chuan pawikhawihtute hi IS firfiakte niin a puh. Firfiakte hian Abu Graib bula in tower pakhat leh thlanmual awmna bial chu an la a, hei hi lak let tumin security force-ten an bei let nghal a ni.

Abu Ghraib-a inbeihna thleng vang hian curfew puan nghal a ni a, security force-te chuan a bula airport chu an veng nghal niin official-te chuan an sawi. Iraq sipaite chuan helicopter hmangin IS firfiakte awmna hmun chu an bomb a, Interior Ministry thupuangtu Brigadier General Saad Maan chuan sorkar beihpui thlaknaah hian firfiak 20 vel an thi niin a sawi.