Israel palai thlengtu Egypt MP in beih a tawk

Egypt MP Tawfik Okasha chuan Dakahlia province-a a chenna inah Israel palai, Haim Koren chu zanriah a buatsaih sak vangin Pathianni khan Parliament-ah politician dangten nasa takin an sawisel a, MP pakaht chuan session laiin pheikhawkin a vawm.

Pathianni-a Parliament inkhawm neihah member-te chuan Okasha chu a thiltih avang hian an demna thu an sawi a, member pakhat Kamal Ahmed-an a pheikhawka a vawm lai hian midangte chuan kut an lo beng a ni. He thil thlen hnu hian rorel inkhawmna aṭang hian Okhasha leh Ahmed-te hi chhuah tir nghal an ni.

Israel palai Koren leh Okasaha-te hian kar kalta Nilain zan khan zanriah kil dunin Palestinian leh Israel-te buaina chungchangte an sawidun a ni. Israel embassy chuan a Facebook page-ah thlalakte dahin, an thu sawidunte hi a tarlang a ni.

Dakahlia khuaa cheng mi tam tak chuan MP Okasha-an Israel palai zanriah a kilpui hi an dem thu sawiin, petition siamin hming te an sign a ni. MP ṭhenkhat pawhin Parliament speaker, Ali Abdel Al hnenah lehkha thawnin Okasha hi hrem turin an phut bawk.

Mahse Okasha chuan Egypt leh Israel chuan palai an intir tawn a, hei vang hian Israel palai a lo hmuh avang hian thil a tihsual loh thu a sawi. Egypt ramah Israel company 22 pawh an inbun mek a ni, a ti.

Israel ambassador Koren chuan meeting neih hi Egypt MP hian a rawt tih sawiin, Israel-in tui, agriculture leh zirna lama Egypt a puih theih dan turte an sawi dun a, school pawh Israel-te training pekna hnuaia tam zawk hawn a duh thute a sawi a ni, a ti. MP rawtna siamte hi lo ngaihtuah a tiam thu sawiin, meeting nei tura a sawm ve leh thuai tur thu a sawi.