Niger President thlanah majority hmu pha an awm lo

Niger President thlanna neihah candidate zingah tling tura vote hmuh ngai zat hmu pha an awm lo a, inthlan thawh hnihna neih a ngai dawn a ni.

Inthlan thawh hnihna hi March 20-a neih tura ruahman a ni. Candidate zinga vote hmu sang pahnihten inthlan hi an hmachhawn leh ang.

Pathiannia inthlanah hian President ṭanglai, Mahamdou Issoufou chuan vote a hmu sang ber a, vote tla aṭangin 48% a hmu a, mahse tling tura vote hmuh ngai zat 50% chu vote 167,000 in a hmu pha lo a ni. Eptu hruaitu, jail-a tang mek Hama Amadou chuan dawtin vote 18% a hmu.

Eptu pawl candidate, Amadou hi naupang hralhnaa inhnamhnawiha puh a nih avangin ram pawnah a tlan-chhia a, nikum November thla khan an ramah kir lehin jail-ah dah luh nghal a ni. Amadou chuan an puhna hi thu dik lo a ni tiin, amah tihchhiat an tumna vang niin a sawi thung. Jail aṭangin inthlan dawn hian a campaign a ni.

Niger President thlanna neihpui tur hian African Union chuan observer 40 a dah a, inthlanna chu a lungawi thlak thawkhat niin an sawi. President thlannaah hian candidat 14 an awm a, an zingah hian prime minister hlui pahnih an tel.