Israel-Hamas war :Hamas-in inkahhai puan hma an mi hrente chhuah tum tawh lo

Palestinian firfiak pawl, Hamas chuan October 7-a Israel an beih ṭuma an mi man zinga pali an chhuah hnuah, Israel-in inkahhai a puan hma chuan an mi hren dangte chu chhuah an tum tawh lo tih an sawi.

Hamas rorelna, Gaza Strip-a health ministry-in Israel sipaite beihpuithlaknaa thi zat a puan chu US president Joe Biden chuan a rintlak kher em tia zawhna a siam hnuah, ministry hian mitthite hi an hming nen an tar chhuak zui a ni.

October 7-a Israel-in Hamas beihna phuba la a, Gaza Strip a beih let aṭang khan Palestnian mi 7,028 vel an thi tawh. Israel lamah mi 1,400 chuang an thi bawk. Israel chuan nasa zawka beihpuithlak chhunzawm zel a tum tih a sawi. Ningani zan khan Israel sipaite chuan Gaza hmar lam chu tank nen an bei zui leh a, firfiak hmun pawimawh eng emaw zat an tichhia.

UN Humanitarian Coordinator for Occupied Palestinian Territory chuan nimin khan Gaza Strip-a chhawmdawlna phurtu truck pariat an luh belh leh tih sawiin, heng motor-ah hian ei tur, damdawi leh tuite an phur a ni. Egypt-in chhawmdawlna phurtute tana Rafah border crossing hawn a remtih hnuah, Gaza-ah hian truck 74 an lut tawh. Mahse hengte hian mipuite mamawh a la phuhru pha lo hle tih UN chuan a sawi.

Hamas chuan Arab leh Muslim ram mipuite chu nimin leh Pathiannia Rafah crossing hawn leh, Gaza indona tihtawp phutna lantir turin an sawm. Pun khawmnaah hian au hla atan 'Open the Rafah crossing' leh 'Stop the genocidal war on Gaza' tih hmang turin an ngen a ni. Israel-in a thununna hnuaia Gaza Strip kalpawhnate a khar vek avangin, Egypt rama Rafah border crossing chauh hi Gaza kalpawh theihna awmchhun a ni rih.