Pakistan court-in Imran Khan bail dilna a hnawl

Pakistan court chuan an ram prime minister hlui, Imran Khan-a'n thuruk tiput rua puhna thubuai a neih meka bail a dilna leh, a laka FIR theh luh sut tura a ngenna chu a hnawlsak.

Kum 71 mi, Khan hi nikum khan US-a Pakistan embassy-in secret diplomatic cable (cipher) a thawn tiput rua puh a ni a, hei vang hian thubuai siamsak niin August thla khan man a ni. A thawhpui, foreign minister hlui Shah Mahood Qureshi pawh he thilah vek hian thubuai siamsak a ni bawk.

Pakistan Tehreek-e-Insaf (PTI) party chairman, Imran Khan hian Islamabad High Court-ah bail dilna hi a theh lut a, hei bakah hian August thlaa Federal Investigation Agency (FIA)-in a laka FIR an theh luh chu hnawl turin a ngen bawk a ni.

April 2018 - April 2022 chhunga Pakistan Prime Minister dinhmun chelhtu, Imran Khan hian Prime Minister a nihna aṭanga paihthlak a nih hnuah, paihthlak a nih theihna turin US-in a phiar nia sawi sawi fiahna atan sorkar thuruk hi a sawi lang a ni. US chuan Khan puhna hi a pha thung. Nikum April thlaa no-confidence vote hmanga paihthlak a nih hnuah Khan hi thubuai 150 chuang siamsak a ni tawh.