Malaysia lal thar tur thlang

Malaysia chuan an ram lal thar atan chhim lam, Johor state-a lal chhungkuaa mi, Sultan Ibrahim Sultan Iskandar an thlang. Malaysia lal 17-na tur a ni dawn a, nakkum January 31 aṭangin he dinhmun hi chelhin, kum nga chhung lal a ni ang.

Nimina Conference of Rulers session neihah, an rama sultan pakuate chuan lal thar atan Sultan Ibrahim hi an thlang a ni. Lal atana an thlan thar hi kum 64 mi niin fa paruk a nei. A pa kha Malaysia lal pariatna niin, kum 1984-1989 chhung khan lal a ni. Johor lal chhungkuua hi hausa leh thil tithei tak an ni a, private army pawh a nei.

Malaysia ram hi lal rorelna hnuaia awm niin lal chhungkua hi pakua an awm. Heng lal chhungkua pakuate aṭang hian an ram lalber dinhmun chelh tur hi kum nga danah an thlak kual ṭhin. He system hi kum 1957-a Britain lak aṭanga independence khan an hmang ṭan a ni.

Sultan Ibrahim hi ram chhung bakah ram pawnah lehkhate a zir ṭhin a, an ram sultan zinga midang hneh thei leh, ngaihdan tlang taka sawi chhuak ngam tia sawi a ni ṭhin. Social media lamah pawh a lar hle. Fast car leh motor-bike lam lawm tak a ni a, jet leh helicopter khalh a lo zir tawh bawk a ni. Motor hi 300 chuang a nei a, heng zingah hian Harley-Davidson leh Bugatti Veyron pawh a tel. Hei bakah hian ran a khawi nasa bawk a, sakei, sakeibaknei leh awle te a khawi bawk.