US Super Tuesday-ah Trump leh Clinton-i chak
US-a Republican leh Democrat party-ten an party candidate zawnga Thawhlehni-a state 11-a primary election an buatsaihah, Republican lamah Donald Trump leh Democrats candidate zingah Hillary Clinton-te an chak.
Super Tuesday-ah hian Trump leh Clinton hi state 11 zinga pasarih-ah ve ve an chak a, November thlaa US President thlanna neih turah an party president candidate chang thei turin an dinhmun pawh an siam nghet sawt hle.
Republican party candidate zingah Donald Trump hi Virginia, Arkansas, Alabama, Massachusetts, Tennessee, Vermont leh Georgia-ah a chak a, Ted Cruz chu Texas leh Oklahoma-ah chakin, Marco Rubio chu a vawikhatna atan Minnesota-ah a chak ve bawk. Alaska inthlan result erawh hriat a la ni lo.
Democrat candidate hmahruai mek, Hillary Clinton-i chu Massachusetts, Texas, Arkansas, Alabama, Tennessee, Georgia leh Virginia-ah a chak a, mihang tamna lam chhim lam bialah a che ṭha hle. Clinton-i dawttu Senator Bernie Sanders chu Oklahoma leh Vermont primary bakah Minnesota leh Colarado caucus-ah a chak.
Candidate-te hian July thlaa party convention neih turah anmahni vote-tu tur palai, delegate neih tumin an bei mek a ni. Republican party chuan nomination hmu tura delegate neih ngai zat, 1,237 aṭangin 595 dawn awmnaah inthlan an la nei lo a, Democrats lam chuan nominee ni tura delegate mamawh zat, 2,383 aṭangin 865 awmnaah an inthlang tawh a ni.
Republican Party candidate zingah Trump hian delegate 257 a nei tawh a, Cruz-ah 106, Rubio-an 67, Kasich-an 23 leh Carson-ah delegate pariat a nei tawh.
Primary election hi state tinah party pa-hnihte hian an nei a, mahse he inthlan hi state sorkar bul tum niin, state election official-te kaihhruai-naah inthlan hi buatsaih a ni ṭhin. Party pahnih-a registered voter-ten an party president candidate atana an duh an thlang
ṭhin a ni. State tin hian national convention-a an party president candidate thlanna turah delegate eng emaw zat an neih vek a, primary election-a candidate chak hian vote tla aṭanga a percent hmuh dan angin delegate hi a nei a ni. Causus hi political party-ten an party registered voter aṭanga inthlan an buatsaih a ni.