US leh Iraq-i Mosul lak let tum

Iraq Prime Minister Abadi chuan Iraq security force-te chuan US puihin Islamic State (IS) firfiak pawl kuta awm mek, Mosul khawpui la let turin tun thla tawp lam hian beihpui an thlak dawn tih a sawi.

Pentagon official-te chuan Syria khawchhak lama IS-te ram lak eng emaw zat lak let chuan Iraq supply line pawimawhte a siamṭhat phah niin an sawi a, Mosul lakletna tura beihpui thlak theihna turin kawng pawh a sial phah niin an tarlang.

Joint Chiefs of Staff chairman, Gen Joseph F Dunford chuan Mosul khawpui lak let dan tur hi US puihnain ruahmanna hi siam mek a ni tih a sawi. Kar hmasa khan Arab sipaite cuan Syria khawchhak lama Shaddadi khua chu firfiakte kut aṭang hian an lak sak tawh a, hei hian IS-te headquarters, Syria rama Raqqa bial leh Mosul khawpui inzawmna pui ber pawh a chhutchat phah niin Defence Secretary Ash Carter chuan a sawi.

Hetihlai hian military official-te chuan Mosul khawpui lak let tuma inbeihna hian thla eng emaw zat a awh mai thei tih an sawi.

Pentagon chuan Mosul beihna turah hian Kurdish fighter-te pawh telh an nih mai thei tih a sawi. US sipaite hian Kurdish fighter 16,000 vel chu training an lo pe tawh ni.

Kum 2004 khan sipai 13,000 chuang zetin hel 3,000 vel kut
aṭangin Fallujah khua lak tumin an bei a, thla hnih dawn hnuah an la thei chuah a ni. He indonaah hian US sipai 95 an thih bakah midang 560 in hliam an tuar a ni. Military expert-te chuan Fallujah aiin Mosul khua lak tuma an beihna hi a hautak zawk dawn niin an sawi.