UN resolution siam hnuah NKorea-in missile kap chhuak
United Nations Security Council-in North Korea ram na zawka hrekna tur resolution a pass hnu lawkah, North Korea chuan nimin zing khan short-range projectile missile paruk chu East Sea-ah a kap leh.
South Korea Defence Ministry thupuangtu, Moon Sang-Kyun chuan nimin zing dar 10 vel khan NKorea hian Wonsan bial aṭangin projectile missile paruk hi East Sea-ah a enchhin tih a sawi. Heng projectile te hi hriat chian ni lo mah se, KN-01 short range missile nia hriat a ni a, 300-mm multiple rocket launcher aṭanga kahchhuahan ni.
Sang-Kyun chuan NKorea sipaite chetdan chu an thlithlai reng tih a sawi. NKorea sipaite hian kumina short-range projectile a kahchhuahna hmasa ber a ni a, nikum June thla khan an ram khawchhak lam tuipuiah KN-01 missile pathum hi an lo kap chhuak tawh bawk.
Nilaini khan UNSC chuan NKorea-in nuclear test a neih avang hian hrekna thar a siam. Hei hi UN-in NKorea hrekna a siam pali-na a ni. Kum 2006, 2009 leh 2013-te khan NKorea hi atomic hmanruate a enchhin avangin hrek a lo ni tawh bawk. Tuna hrekna thar a siam lehna chhan hi Jnauary 6-a nuclear bomb a enchhin avang leh, February 7-a msisile techno-logy a enchhin leh vang a ni.
UN hrekna thar siamah hian NKorea ram mimal hming 16 leh pawl hming 12 chu blacklist-ah telh thar an ni a, NKorea rama bungrua lut leh chhuak turte chu enfiah vek an ni bawk ang. Hrekna thar siam tur chungchanga hi US leh NKorea ram ṭhianṭha, China chuan kar sarih chhung ngawt an lo sawi dun tawh a ni.
UN member ramte chuan NKorea-a bungraw thawn luh tur leh thawnchhuah turte chu an endik vek thei tawh dawn a, UN phalna nei loin ramdang financial institution-te chuan NKorea-ah office an hawng thei lo ang. NKorea bank-te pawh ram pawn lamah branch an hawn khap sak an ni bawk.
US President Barack Obama chan khawvel ram hrang hrangte chuan NKorea chu nuclear programme hlauhawm tak a kalpui mek titawp a, a mite tana kawng dik leh ṭha zawk zawh turin lungrual takin thu an titlu a ni, a ti.
South Korea President Park Geun-hye pawhin UN resolution siam chu ṭha a tih thu a sawi a, NKorae chuan nuclear ralthuam siam tuma a beihnate a tihtawp ngei a beisei thu a sawi.