New Zealand mipuiten an ram flag tur thlang

New Zealand mipuite chuan an ram puanzar thlak duh leh duh loh chungchangah nimin khan vote an thlak.

New Zealand flag hman mekah hian British Union Jack a lang a, an ram zia lantirna silver fern a lang tel bawk. Mahse mi ṭhenkhat chuan an ram flag hi Australia flag nen a in an bakah, Union Jack lang hian British awpna hnuaia an awm lai a lantir a ni tiin, hei hi thlak a hun tawh nia an ngaih thu an sawi.

Mipuite ngaihdan lak hun hi an hawng rei dawn a, nimin aṭang khan vote la ṭanin, kar thum chhung vote thlak theih a ni ang. March 24 hian result puan a ni dawn a ni.

Flag chungchanga mipuite ngaihdan lak a nih theihna tura buaipuitute chuan ram ṭhenkhatte chuan an ram puanzar hi nawrh huaihawt hmang emaw, roreltuten emaw an thlak mai ṭhin a, mahse an ni chuan mipuite duhthlanna an la dawn tih an sawi.

Vote thlak hmaa mipuite ngaihdan lakah, New Zealand mipui maktaduai 4.7 vel chuan an flag hmanlai hman chhunzawm an duh tih an sawi. Flag thlak an tumna chu a landan an duh loh thu leh, Prime Minister John Key-an a hming a chher tumna mai nia an ngaih thu an sawi. Sawiseltu ṭhenkhat pawhin vote lak a nih vang hian a buaipuina sensoah dollar maktaduai 27 vel zet senral a ni dawn a, hei hi a lo thlawna sum khawralna mai nia an ngaih thu an sawi ve bawk.

Sorkar chuan an ram flag thlakna tur design turin mipuite a sawm a, hun hawn chhungin design 10,000 chuang a lut hman a ni. Nikum December thla khan popular vote hmangin design thehluh zinga architectural designer Kyle Lockwood-a siam chu hnam puanzar hmanlai mek nena elpui tura thlanchhuah a ni ta a ni.

Lockwood-a flag siamah hian an flag hmanlai ang bawkin Southern Cross entirna red star pali a lang a, mahse Union Jack chu fern-a thlain a background color pawh tihdanglam a ni bawk.