MH370 them nia hriat enfiah dawn

Kum 2014, March 8-a Kuala Lumpur aṭanga Beijing pana thlawk, chin hriat loha bo zui ta Malaysian Airline Fligth MH370, Boeing 777-200ER them nia hriat chu Mozambique ramah an chhar.

Australian Minister for Infrastructure and Transport Darren Chester chuan MH370 them nia hriat hi enfiah turin Australia-ah lak a ni dawn tih a sawi. Mozambique tuipui kama thlawhtheihna tla them an chhar hi meter khat vela sei a ni.

Thlawhtheihna them hi kar tir lam khan Hnhambane province-a Vilanculos tuipui kamah sangha mantute leh American khualzinten an chhar a, Mozambican National Civil Aviaton Institute hnenah an hlan nghal a ni.

Nikum khan thlawh-theihna thla them nia hriat chu Indian Ocean-a Mozambique awmna lam, La Reunion thliarkarah chhar a lo ni tawh bawk a, hei hi enfiah a nih hnuah MH370 them a ni tih a hnuah nemngheh a ni. Hei chauh hi MH370 them hmuh awmchhun a la ni.

MH370 chungchanga Joint Agency Coordination Center (JAAC), Australia ami in report a tihchhuah hnuhnung berah chuan lawng pali hmangin Australia khawthlang lam tuipuiah zawn chhunzawm reng a la nih thu a sawi. Thlawhtheihna bo hi tui hnuai km 85,000 bialah zawn a ni tawh.