US vauna karah Iran oil tanker-te'n Venezuala thleng

Iran oil tanker pangate chuan Venezuala tuipui an thleng ta a, fuel barrel maktaduai chuang an phur. 

Iran leh Venezuala ram hrek mektu US chuan convoy chu an enzui reng tih sawi mah se heng ram pahnihte hian Washington chu inrawlh lo turin an vau let ve leh thung a, hemi a nih avang hian Venezuala navy leh air force-te chuan Iran tanker-te hi an veng a ni. 

Iran tanker pangate hi Fortune, Forest, Petunia, Faxon leh Clavel tiin a hming an vuah a,  Refinitiv Eikon shipping data aṭanga a lan dan chuan tun thla tir lam aṭang tawh khan Suez Canal kaltlangin tuialhthei barrel mtd 1.5 an phur a ni. Venezuelan oil minister Tareck El Aissami chuan Fortune-in an ram a thlen vekah khan twitter-ah an economic zone a thlen thu a tarlang nghal bawk.

Inrinni khan Iran president Hassan Rouhani chuan an ram tanker lo dangte chu an beilet nghal dawn tih sawiin vauna thu a tichhuak a, tunah erawh Venezuala ram tuipui hi an thleng vek tawh a ni. 

Carribbean tuipuiah hian US Navy leh Coast Guard eng emaw zat chu patrol reng mah se Iran tanker an dang dawn tih engmah an sawi lo thung a, mahse Iran leh Venezuala ramte hi a hrek lai ram an nih avangin heng ram pahnihte hi an fimkhur hle thung.

Khawvela oil reserve lian ber nei mah se Venezuala hian tuialhthei an tlachham a, president Nicolás Maduro chuan Iran hnenah hian an thlawpna avangin lawmthu a hrilh a, Iran leh Venezuala chu 'revolutionary ram pahnih North America imperialism hmaa ṭhingṭhi ngai lo tur' tiin a sawi hial.

An ram mipuite hmaa TV kaltlanga thu a sawinaah Iran leh Venezuala chu remna duh ram an ni tih leh zalen taka insumdawng tawn tur pawhin dikna an nei tih a sawi. Hetihlai hian US chuan heng ram pahnihte hi a hrek a, sumdawnna kawngah a thawhpui duh lo ve ve thung.

US State Department thu­puangtu Morgan Ortagus chuan Venezuala-ah chuan president thlanna dik leh felfai a awm a ngai niin Pathianni khan a la sawi fan a, US hian Nicolás Maduro hi Venezuala president-ah hian a pawm duh lo a, eptu pawl hruaitu  Juan Guaidó chu a pawm zawk a ni. 

Kum 2018-a President atana Nicolás Maduro thlan tlin a nih danah khan Juan Guaidó leh a kaihhruai eptu pawlte chuan thil fel lo a awm tih sawiin an pawm loh thu an sawi a, nikum January khan Juan Guaidó hi interim president-ah a inpuang zui a, hei hi US leh ram dang eng emaw zatin an thlawp a ni. 

Hemi hnu hian ram pahnih inkar boruak hi a ṭha lo zui hle a, Venezuala hian economy leh politics lamah harsatna nasa tak tawk zuiin nikum chhung khan an ram inflation chu 800,000% lai a ni a, mi mtd 4.8 zetin an ram an chhuahsan bawk. 

Hei hian nasa takin Venezuala oil market a nghawng a, hripui a len bawk avangin Venezuala hi an buai hle. Trump kaihhruai US sorkar chuan February leh March khan hrek an nih thu puang nawn lehin hei vang hian a bikin tuialhthei an tlachham hle a ni.