China-in defence budget tihpun a tum

China chuan kum 2016 defence budget chu 7-8% vela tihpun a tum thu Parliament thupuangtu, Fu Ying chuan a sawi.

Nimina chanchin thar lakhawmtute a kawmna-ah, Fu Ying chuan he thu hi a sawi a, vawiina National People's Congress session ṭan hnuah sum dah tur zah hi puan a nih tur thu a sawilang nghal bawk. China hian nikum khan defence budget hi 10.1% in a lo tipung tawh bawk a ni.

Kum 2010 hnu lamah China hian kumtinin a defence budget hi double digit in a tipung ziah a, kumin hi single digit-ah a tihpun ṭum khatna tur a ni. Nikum chhunga China economy ṭhanna hi 6.9% a ni a, kum 25 chhunga a hniam ber ṭum a ni.

Nikum chhunga defence budget tana sum a dah chu Yuan tluklehdingawn 886.9 (dollar tluklehdingawn 135) a ni a, mahse hei hi US in defence budget hmun li-a ṭhena hmun khat hu vel chauh a tling. US chuan kum 2016 Defence Department budget atan dollar tluklehdingawn 573 a dah.

Vawiina ṭan tur, 12th National People's Congress (NPC) Fourth Session hi March 16 thleng neih a ni dawn a, session secretary-general atan Li Jianguo chu thlan a ni. Tun ṭum session-ah hian 13th five-year national development plan chu ennawn a ni dawn a, hetah hian kum 2016-2020 chhunga economy leh social lama China ram hmasawnna turte chu dah pawimawh an ni.

China rama charity lama kaihhnawih dan siam hmasak ber, charity law draft pawh endik a ni dawn bawk. He bill hi NPC Standing Committee bi-monthly session ah ṭum hnih ngaihtuah a ni tawh.

Session chhung hian high-profile press conference ṭum 15-16 buatsaih a ni dawn bawk a, session tawp lamah Premier Li Keqiang leh minister dangten press conference hi an nei ang. Press conference-ah hian session-a an thil rel zinga an ram mipuite leh khawvel ram dangte an hriat topic tam tak an sawichhuak dawn a ni, a ti.