Jamaica PM thar la lut

Jamaica Prime Minister thar Andrew Holness chu Governo-General, Sir Patril Allen-an rinawmna thu tiam tirin a la lut.

Kar hmasaa inthlan neihah eptu pawl, Jamaican Labour Party hruiatu hian Jamaica rama hmeichhe prime minister hmasa ber leh PM ni lai, Portia Simpson Miller a hneh a ni.

Kum 43 mi, Prime Minister thar Andrew Holness hi education minister hlui a ni a, inthlan dawna a campaign-naah an ram sum dinhmun siamṭhat te, zirna leh health-care tihchangtlung te, hna thar tam zawk siamte a tiam a ni.

Ram hruaitu thar atana lakluh a nih hnua thu a sawiah, Holness chuan Jamaica ram chu Carribean rama sumdawnna, arts leh culture hmunpuia siam a duh thu a sawi. An ram mipuite duhthusam tihpuitlin sak chu a chak ber a nih thu sawiin, Jamaica ram chu mipuite tana beiseina leh vanneihna awmna ramah siam a, naupangten hmathlir ropui tak an neih theihna tura siam turin mipuite a fuih.

Kar hmasa Ningani-a inthlanpui neihah Jamaica Labor Party hi constituency 63 zinga 32-ah a chak a, rorellai People's National Party chu bial 31-ah a chak a ni.