Trump-a hawisan turin Republican te ngen

US President thlanna Republican presidential nominee hlui, Mitt Romney leh John McCain-te chuan 2016 US President thlanna neih tura an party president candidate chuhtu zing a mi, Donald Trump chu hawisan tawh turin an party mite an ngen.

Republican president candidate chuhtu zingah Donald Trump hian hma a hruai mek a, mahse a thusawi dengkhawng tak tak avangin sawisel a hlawh hle. An party candidate dangte pawh ṭawngkam mawi lo takin a sawisel fo a ni.

Donald Trump hu an ram President ni tur chuan a tling tawk lo nia an ngaih thu leh, President a nih chuan an ram tan a hlauhthawnawm tur thu Romney leh McCain-te chuan an sawi.

Romney chuan sumdawng hausa, Donald Trump chu takna nei lo, mi lem mai a ni tiin, party candidate dangte chu Trump ai chuan an
ṭha vek zawka a ngaih thu a sawi. July thlaa party convention neih hunah Trump chu Republican party president candidate tura nominate a nih chuan, President thlan hunah Democrat candidate Hillary Clinton-i a tlin phah dawn a ni, a ti.

Trump chuan Romney-a hi chhang let nghalin, kum 2012-a an party president candidate a nih ṭum khan a tihtur engmah a hre lo a ni, a ti.

Republican president ni tur hian canidate hian delegate 1,237 a neih a ngai dawn a ni. Trump hian candidate zingah delegate a ngah ber tawh a 316 a nei tawh. Texas Senator Ted Cruz chuan 226 neiin, Florida Senator Marco Rubio chuan 106 a nei tawh bawk.