Slovakia inthlanah PM Fico a chak

Slovakia ram inthlanpui buatsaihah Prime Minister ṭanglai Robert Fico chu a chak a mahse parliament-ah majority a nei pha lo.

Robert Fico hian an rama raltlan luh tum lakah khuahkhirhna khauh tak a siam avangin sawisel a lo tawk fo tawh a, Muslim mi raltlan pakhat mah an rama lakluh a tum loh thu a sawi

Fico-a party, Smer-Social Democracy party hian parliament seat 150-ah seat 48 a nei a, sorkar siam turin party dang a thawhpui a ngai dawn a ni.

Parliament inthlanpuiah hian party pariatte chuan member a nei thei dawn a, Nazi ngaihsangtu leh tun thlenga Nazi thuam la inbel fo tu, Mraian Kotleba party, People’s Party - Our Slovakia l pawhin vote tla aṭangin 8% chuang hmuin, Parliament member a nei dawn a ni.

PM Fico hian zirlai leh pensioner-te tan a thlawna rel-a chuan theihna policy a siam avangin a lar phah hle. EU member ni mah se, EU-in Greece leh Italy-a raltlan lutkhawmte Europe ram danga semkual a tum dan chu na takin a dodal. EU ruahmanna hnuaiah hian Slovakia hian raltlan 2,600 vel an lo dawng ve tura tih a ni. Mahse nikum chhung hian Slovakia hian raltlan 260 chiah a la lut.