SKorea-in NKorea hrekna thar puang dawn

South Korea chuan a ṭhenawm ram, North Korea hrek-na thar a siam chu puan chhuah thuai a tum.

Kar kalta Nilaini khan United Nations Security Council chuan tunhnaia nulcear test leh missile a enchhin leh avangin North Korea hrekna na zawk siam hi a lo remti tawh bawk a ni. Hemi zulzui hian SKorea chuan hrekna thar hi a siam ve leh dawn niin sorkar official pakhat chuan a tarlang.

UNSC in hrekna thar a siam hnu hian a chhan letna atan NKorea chuan rocket a kap-chhuak leh nghal a, an ram hotu Kim Jong-Un chuan an nuclear ralthuam neihte chu a ṭul huna hman theih tura inring reng turin a hriattir bawk.

SKorea chuan hrekna thar a siam tur hi a la sawilang lo a, mahse a hrekna tharah hian North aṭanga South Korea lawngchawlh hmuna lawng an dah ṭhinte pawh a khap tel tawh dawn nia sawi a ni. Hei bakah hian North lama mimal leh pawl, ralthuam an siamna kawnga inhnamhnawihte pawh hrek tel an ni bawk ang.

February thla khan Korea ram pahnihten an thawh dunna, Kaesong industrial park-a North lam mi hnathawkte hlawh atana sum pek chu NKorea sorkar chuan nuclear programme a kalpuina nan a pawhpen sak ṭhin nia sawiin South lam hian a lo khar tawh bawk a ni.