US leh S Korea sipaiten nunchan an zir N Korea-in nuclear ralthuam hmanah a vau
North Korea-in a vauna karah US leh South Korea sipaite chuan nunchan an zir ṭan a, kum dang zawng aiin sipai tel an ṭhahnem.
US leh South Korea sipaitena nunchan an zir 'Key Resolve and Foal Eagle' tia an vuahah hian kum dang zawng aiin heng ram pahnih-te hian sipai an telh hnem a, sipai nunchan zir an buatsaih tawh ṭuma lian ber a ni; US leh SKorea-te hian kum tinin sipai nunchan zirna hi an buatsaih ṭhin a ni.
NKorea chuan sipai nunchan zir buatsaih an tum dawn aṭangin a lo sawisel tawh a, US leh SKorea te hi nuclear ralthuam hmanga beihah a vau a ni. Hetianga vauna hi NKorea hian a hma pawhin a lo tichhuak fo tawh a, mahse mithiamte chuan NKorea hian a missile-ah nuclear bomb a vuah theih ngei leh ngei loh hi an sawi thei lo a, ṭhenkhat chuan a vuaha a hman theih an ring lo.
Key Resolve and Foal Eagle-ah hian US sipai 17,000 zet an tel a, SKorea lamah hian sipai nuai thum vel an tel niin an sawi a, nikuma nunchan an zir dun ai chuan sipai tel an ṭhahnem zawk hle a ni. Key Resolve bikah hian computer leh tunlai thiamnate indonaa hman dan bik zir a ni a, March 18 thleng hetiang hun hi hman a ni ang a, Foal Eagle-ah hian sipaite indona muala chet dan bik zir niin, April 30 thleng khian hetiang hian nunchan an zir dawn a ni. SKorea chuan nunchan zirnaah hian N Korea hruaitute beih chat dan tur leh, an nuclear leh missile te beih dan tur an zir tel niin a sawi.
NKorea-in nuclear ralthuam hman chungchang a sawi chhuah hi a chhehvel ramten an helh hle. SKorea defence thupuangtu Moon Sang-gyun chuan, "NKorea hian kan vaukhânna engah mah a ngai lo a, buaina chawkchhuak zawnga a che a nih chuan khawngaihna tel loin kan chhang let ve nghal ang," a ti. Japan foreign minister chuan NKorea-in nuclear leh missile lama a hmalakna chu pawmzam mai mai theih a ni lo tih sawiin, "Khawvel ram dangte nen thawkhoin, North Korea khuahkhirh dan hi kan zawngin nasa lehzuala khuahkhirh turin kan ngiat ang," a ti.
Hetihlai hian Philippines chuan kar kalta Inrinni khan NKorea lawng, bungraw phur chi chu a hrêng. Tunhnaia thermonuclear bomb a enchhin avang leh rocket a kah chhuah avangin UN chuan NKorea hrekna thar a siam a, UN-in hrekna a tih-chhuah ang hian Philippines chuan N Korea lawng hi hrêngin, UN palaite endik turin a dah a ni.
US leh SKorea te hian SKorea-a missile kahthlakna THAAD dah chungchang kar kalta Zirtawpni aṭang khan an sawi dun ṭan. Missile kahthlakna dah chungchang hi Russia leh China chuan an duh lo hle a, China chuan THAAD dah a nih chuan an ram himna leh venhimna atan a hlauhawm thei a ni, a ti. THAAD-in a kah phak chinah hian China leh Russia ram chhung eng emaw zat a huam avangin heng ramte hian an duh lo a ni.