US First Lady hlui Nancy Reagan boral

US First Lady hlui, Nancy Reagan chu kum 94 mi niin Thawhṭanni khan a chenna Bel-Air, Los Angeles-ah a thi.

Nancy Reagan hi kum 2004-a boral ta , US President hlui Ronald Reagan-a nupui a ni a, a ruang hi a pasal an phumna hmun Ronald Reagan Presidential Library,Simi Valley California-ah phum a ni ang.

Reagan hi lemchan thiam a ni a, a pasal nen hian kum 1950 khan an innei a, fa pahnih an nei. California first lady pawh a ni tawh a, niin, kum 1967-75 chhung khan a pasal chu state governor a ni. Kum 1981 khan Ronald Reagon chu US President atana thlan niin, Nancy Reagan hi kum 1981-89 chhung khan US first lady a ni leh ta a ni.

A pasal President a nih lai hian Nancy Reagan hian drugs do beihpui thlakna, 'Just Say No' campaign chu a lo ho tawh a ni. A pasal hi a theihtawpin a ṭawiawm ṭhin a, a pasalin kum sawm dawn Alzheimer natna a vei laite khan duat takin a enkawl ṭhin. Alzheimer tihdamna damdawi siamchhuah tuma stem cell research neih pawh a thlawp hle.

US President Barack Obama chuan Reagan chhungte a tawrhpui thu a thawn nghal a, President hlui Jimmy Carter chuan Nancy Reagan a ui thu leh, a thihna chu US tana channa nasa tak a nih thu a sawi.