Pakistan-ah thihchilh a bomb puak

Pakistan hmar lamah thihchilh nimin khan thihchilh bomb a puak a, mi pakua aia tlem lo an thih bakah, mi 18 aia tlem loin hliam an tuar a, an zinga paruk te dinhmun chu a ngaihtuah hle a ni.

Bomb puak vanga hhi zingah hian hmeichhe pahnih leh hmeichhe naupang pakhat an tel.

Police thuchhuah chuan, thihchilh bomb hi Khyber-Pakhtunkhwa province, Charsadda district Court kawtah tih puah a ni a, hei hi Peshawar khawpui atanga km 30 vela hla a ni.

Shabqadar police Inspector Ali Jan Khan chuan bomb paitu hi court-ah luh a tum niin a sawi a, mahse a luh theih loh avangin court kawt-ah hian a bomb pai hi a tipuak ta a ni, a ti.

Medical team lam chuan bomb puahna hmun hi an pan nghal a, hliamte chu damdawi in pan pui an ni a, an zinga ṭhenkhat chu an dinhmun a ṭhat loh avangih thi pawh hi an punbelh rin a ni.

Pakistan firfiak pawl, Tehreek e-Taliban te chuan he thil thleng hi an tih a nih thu an sawi. Charsadda hi Mohmand tribal district bula awm a ni a, Pakistan sipai te chuan he lai hmunah hian al-Qaeda leh Taliban te beihna hmun an siam nghe nghe a ni. Charsadda-ah tho hian January thla khan Taliban te chuan silai hmangin Bacha Khan University an lo bei tawh a, zirlai leh zirtirtu mi 21 ten nunna an chan a ni.