Tunisia-in Libya ramri a khar

Tunisia chuan Libya ramri bula khaw pakaht chu Islamic State (IS) firfiak nia hriatten an beih avangin nimin khan a ramri a khar nghal. Firfiakten an beihnaah hian mi 53 an thi a ni.

Thawhṭanni zan khan fir-fiakte hian silai nen ramri bula Ben Gardane khua hi an bei a, security force-ten bei letin zan rei tak thleng an inkap zui a ni.

Tunisia Prime Minister Hassid Essid chuan pawikhawihtute chu IS firfiak an nih thu leh, firfiakte chuan ramri-ah inthuam chak tuma hma an lak thu a sawi. Tuni-sia President Beji Caid Essebsi pawhin an ram beih anih dan chu ruahman lawk sa vek a ni tih thu sawiin, firfiakten chuan ramri bial chu lak a, an lalram din an tum leh a ni, a ti.

Pawikhawihna thlenna hmun hi nimin khan Interior and defense minister chuan a tlawh nghal a, ramri venhimna khauh zawka kal-pui tum dante pawh a enpui bawk.

Tunisia khua beitute hian sipai barrack leh police post-te an kap a, grenade-te pawh an vawm lut bawk a ni. Tunisia sorkar chuan Ben Gardane khuaah hian nimin khan curfew a puang nghal a ni.

Ben Gardane khuaah hian firfiakte an lut nia sawi a nih avangin kar hmasa aṭang khan sipaite chuan dapchhuah tumin beihpui an lo thlak tawh. Official-te chuan Libya ram chhunga training nei, firfiakte chuan nikum chhung khan Tunisia-ah vawi tam tak pawikhawihna an thlen niin an sawi. Ben Gardane khua hi kalka berah an hmang tih an sawi bawk.

Tunisia hian Libya nena an inri-na hi a hung tawh a, mahse ramri hung hian Libya ram
aṭanga firfiakte lut tur chu a dang thei lo a, hei vang hian ramri te hi khar vek a tum ta a ni.