Israel PM-in US President a hmu duh lo

Israel Prime Minister Benjamin Netanyahu chuan tun thla tawp lama White House-a US President Barack Obama nena meeting nei tura sawma chu a hnar a, Washington a tlawh tum pawh a ṭhulh niin White House chuan a tarlang.

US-in nikuma Iran nuclear deal a siampui chungchangah Israel hi a lawm lo hle a, hei hian an inkar boruak pawh a tihchhiat phah a ni.

White House chuan Israel sorkar hian March 18 leh 19-a ram hruaitu pahnihten meeting nei tur hian a lo ngen tawh a, US chuan March 18-a meeting neih hi a lo remti niin a sawi. White House thupuangtu, Ned Price chuan, 'Ram pahnih hruaiututen meeting an neih tur hi nghakhlel takin kan thlir a, mahse media report aṭangin Israel PM hian kan rawtna hi pawm loin, US a tlawh tum pawh a ṭhulh nia kan hriat avangin mak kan ti hle a ni" a ti. Israel PM programme neihte an lo pawmsak thei lo nia thuthang chu thu dik lo a nih thu a sawi bawk.

PM Netanyahu hian tun thla tawp lama US tlawha President Obama hmuh a tum bakah, US-a Israel thlawptu pawl, AIPAC annual conference-ah pawh thu sawi tura beisei a ni. AIPAC conference-ah hian kum hmasa lamah pawh satellite kaltlangin thu a lo sawi tawh a ni.

Nikum March thla khan Netanyahu hian US Congress-ah thu a sawi tawh a, hetihlaia US leh Iran-in nuclear deal siam tuma hma an lak mekna chu a sawisel a ni.

Hemi hnu hian Pre-sident Obama meeting neihpui a tumna chu hnarsak a ni a, hei hian ram pahnihte inkar boruakah pawh nghawng ṭha lo a nei nia sawi a ni. Mahse nikum November thla khan hruaitu pahnihte hi White House-ah inhmuin, an inkara harsatna awmte pawh an sawifel leh a ni.