SKorea-in NKorea hrekna thar a puang

South Korea chuan a ṭhenawm, North Korea ram hrekna thar tur chu nimin khan a puang.

SKorea-in hian tun hnaia North-in nuclear test a nei leh, long-range rocket a kahchhuah avangin hrekna thar hi a siam a ni a ni. Hemi hma hian UN Security Council pawhin NKorea hrekna na zawk pek dan tur a lo puang tawh bawk.

Nimina SKorea-in hrekna thar a puan rual hian NKorea rama mimal leh pawl eng emaw zat chu blacklist-ah a telh a, hei bakah hian ram pawn lama an mi leh sa awmte chu an awmna rama NKorea restaurant-te pan lo turin a chah bawk.

NKorea hian ram pawna restaurant siam hi an rama ramdang sum a lakluhna lian tak pakhat a ni. SKorea sorkarin a chhutsak danin, NKorea hian ram 12-a restaurant 130 chuang a siam aṭangin kumtinin dollar maktaduai 10 vel a la lut thei a ni. Hei vang hian restaurant sum lakluhte hi a tlem chuan NKorea sum dinhmunah nghawng a nei pha dawn a ni, tiin a tarlang.

SKorea-a Office for Government Policy Coordination hotu, Lee Suk-Joon chuan NKorea-in ramdanga sumdawnna a kalpui aṭanga sum a hmuh tam zawk chu ralthuam siamna atan a hmang a ni, a ti.

Seoul hian NKorea nuclear leh missile programme-a inhnamhnawiha a puh, mimal 40 leh pawl 30-te chu blacklist-ah hian telh an ni a, an zingah hian ramdang mi pahnih leh pawl paruk an tel. Heng mite hi South Korea-a an sumdawn khapsak an ni.