US beihpui thlaknaah IS commander a thi
Islamic State (IS) commander Abu Omar al-Shishani chu Syria-a US sipaiten thlawhtheihna hmanga firfiakte hmun an beihnaah a thi niin US official-te chuan an sawi.
Abu Omar al-Shishani hi 'Omar the Chechen' tia hriat a ni bawk a, US-in IS laka beihpui thlakna program a kalpuina hnuaiah man tuma a duh ber zinga mi niin, a chanchin hrilh thei hnenah lawmman dollar maktaduai nga a lo phal tawh a ni.
Kum 1986-a piang, Shishani hi IS hotu lu ber, Abu Bakr al-Baghdadi adviser pawimawh tak nia sawi a ni a, IS member-te pawh Shishani chungah an innghat nasa hle.
US official chuan US kaihhruaia
ṭang-rual ramte chuan Syria-a al-Sahddai khaw bulah Shishani hi manned leh unmanned aircraft hmangin an bei a, a thi niin a sawi.
Pentagon chuan US thlawpi Syrian Arab Coalition chuan IS firfiakte hi ngawrh takin an bei let mek a, February thla khan firfiakte kut aṭangin al-Shadadi khua pawh an la let niin a sawi. Firfiakte hi an chet ṭhat loh chhoh tak zel avangin an pawl thuam chak tur hian Shishani hi al-Shadadi khuaah tirh a nih thu a tarlang bawk.
Petagon thupuangtu, Peter Cook chuan US sipaite chuan al-Shadadi khaw bula beihpui an thlakna result hi an la zirchiang mek tih sawiin, nghawng erawh a nei na hle niin a sawi.
Cook chuan, Shishani hi Syria-a awm, Geogria ram khua leh tui nihna nei a ni a, IS-ah dinhmun pawimawh tak tak chelhin, minister of war pawh a ni tawh niin a sawi. Shishani thihna hian firfiak pawl ralrel kawngah leh an ram lak chin venhimna an kalpui danah pawh a nghawng nat hle a rin thu a sawi. IS-in ramdang aṭanga member thar tur an lakna kawngah, a bikin Chechnya leh Caucus bial aṭanga mi thar an zawnna kawngah a tello chuan harsatna an thlen phah ngei dawn a ni, a ti.
US official eng emaw zat chuan al-Shaddai khaw bula beihpui an thlakna chu a hlawhtling hle tih an sawi a, beihpui thlaknaah hian IS pawl mi pawimawh 12 an thi tel niin an sawi.
Al-Shadadi biala IS firfiakte beitu, Syrian Kurdish YGP chuan beihpui thlaknaa thi zingah Shishani hi a tel tih thu an dawng a, chanchin kimchang erawh an la hre thei lo tih an sawi.