Iran-in missile pahnih a enchhin
Iran chuan nimin khan ballistic missile pahnih a enchhin niin Fars and Tasnim news agency chuan a tarlang.
US-in hrekna thar a siam palzutin, Iran Islamic Revolutio-nary Guards Corps (IRGC) chuan Thawhlehni khan missile eng emaw zat an lo enchhin tawh bawk a, hemi chungchang hi US chuan UN Security Council-ah thlen a tum tih a sawi a, Iran hrekna na zawk siam tura nawr a tum thu a tarlang.
Thla hnih liamtaa khan US chuan Iran missile programme-a inhnamhnawihan nei company leh mimal te chu kum 2015, October thlaa medium-range Emad missile enchhin a nih avangin hrekna thar a lo siam tawh a ni.
Nimin zinga missile enchhin hi Qadr H missile an ni a, an ram hmarlam aṭanga kahchhuah niin, km 1,400 chin a kap thei a ni.
IRGC deputy commander, Brigadier General Hossein Salami chuan, 'Missile enchhin hi Iran hrek a nih vanga thleng thei a ni. Hrek a nih vang hian Irna hian missile programme a kalpui thei zawk a ni" a ti.
IRGC hi pawl chak tak niin, chetdan hi US leh a thurualpui ramte chuan an lo ringhlel fo tawh a, Middle East-a short leh mediuum range ballistic missile nei ngah ber nia ngaih a ni. US chuan heng missile te hi nuclear ralthuam kahchhuahan atana an hman a hlauhthawng hle a ni.
US leh France official-te chuan Iran-in missile a enchhin hi UN Security Council resolution 2231 palzutna a nih thu a sawi a, he resolution hnuaiah hian Iran chu ballistic missile kaihhnawih thil reng reng a khawih khapsak a ni. Mahse US chuan missile enchhin hian nikuma Iran nuclear deal an siam erawh a palzut lo niin a sawi a, he inremna hnuaiah hian Iran chu atomic programme a kalpui khap a ni thung.