Myanmar President atan Suu Kyi-i driver hlui nominate

Myanmar President thlanna neih tur atan Aung San Suu Kyi-i party, National League for Democracy (NLD) chuan Suu Kyi-i driver hlui leh a ṭhian ṭha tak, Htin Kyaw an nominate.

Nikum November thlaa inthlan-pui an neihah NLD hi hneh taka thlan tlin ni mah se, an ram danpuiin ramdang mi nupui pasala nei leh, an laka fa neite chu an ram President-a dah a khap avangin President atan NLD hotu, Suu Kyi-i hi dah a ni thei dawn ta lo a ni. Suu Kyi-i hian British mi pasalah neiin, fapa pahnih an nei a ni.

Sipai rorel laia ram danpui siamin President atana a din hi khapsak mah se, Suu Kyi-i chuan President aia lal-ah a awm dawn tih a lo sawi tawh a ni.

Myanmar President thlanna neih turah hian Parliament in hnih, Lower House leh Upper House chuan candidate pakhat ve ve an nominate anga, sipai lamin pakhat an nominate bawk ang. Candidate pathumte aṭang hian parliament member-te chuan an ram president tur hi an thlang chhuak dawn a, vote hmu sang ber chu President atan dah niin, a tling lo pahnihte chu vice president-ah an awm zui ang.

Parliament in hnihah hian NLD hian majority an neih ve ve avangin president tur hi pahnih an nominate thei a ni. Htin Kyaw hi Lower House-a NLD MP, Khin San Hlaing-an President candidate atan hian a rawt a, member dangte chuan lungrual takin an lo pawm a ni.

Tunge Htin Kyaw ?

* Kum 1946 ah a piang.

* Suu Kyi-i ṭhian hnai tak niin, Yangon-ah high school an kal dun ṭhin.

* Suu Kyi-in an rama mi retheite ṭan­puina tura foundation a din, Daw Khin Kyi Foundation charity a enkawl ṭhin a, a hnuah Suu Kyi-i driver-ah a ṭang .

* Kum 1990 inthlanpuiah khan NLD candidate a ni a, he inthlanah hian NLD hian hnehna chang mah se sipai sorkarin a pawm lo a ni.

* Oxford University aṭangin ecomics-ah a graduate a, finance ministry-ah a thawk ṭhin.

Parliament Upper House chuan President atan hian Chin minority MP, Henry Van Thio chu a nominate bawk.