NKorea-in missile 2 kapchhuak

North Korea chuan a ṭhen-awm, South Korea leh US sipaiten nunchan an zirho mek lai leh, United Nations Security Council-in an ram hrekna thar a siam hnuah, Nilaini khan short-range missile a kapchhuak leh niin Yonhap news agency chuan nimin khan a tarlang.

South Korea Joint Chiefs of Staff (JCS) chuan short-range ballistic missile pahnite hi Scud missile nia hriat a nih thu sawiin, Nilaini zing dar 5.20 vel khan heng missile-te hi North Hwanghae province aṭangin kahchhuah a ni. Missile-te hi km 500 vel an thlawh hnuah NKorea hmarchhak lam, Wonsan khaw bula East Sea-ah a tla a ni.

Tun ṭum hi kumina NKorea-in short-range ballistic missile a kahchhuahna hmasa ber a ni a, March 3 khan khawchhak lam tuipuiah vek hian 300-mm multiple rocket launcher a lo enchhin tawh bawk.

South Korea leh US sipaiten Thawhṭanni aṭanga nunchan an zirdun mek, Key Resolve and Foal Eagle tia an vuah chu NKorea hian a ngaimawh hle a, vawi tam tak a lo sawisel tawh a ni. Hei vang hian NKorea hian a lungawi lohna lantir nan missile hi a kap chhuak nia sawi a ni.