SKorea-in NKorea sawiselna Leaflet chhuah a khap
South Korea Parliament chuan ramri kaltlanga North Korea lama NKorea ram sawiselna leaflet chhuah ṭhin chu a khap. Hei hi rights activist-te chuan na takin an sawisel zui.
NKorea aṭanga SKorea lama tlanchhe lutte leh rights activist-te hian kum tam tak chu NKorea sawiselna leaflet hi balloon hmangin NKorea ram lamah an chhuah ṭhin a, a changin bottle-ah dahin tuipuiahte an dah ṭhin bawk. Hei bakah hian ei tur, damdawi, pawisa, mini radio leh SKorea news leh drama dahna USB stick-te an thawn lut tel ṭhin a ni.
Leaflet thawn luh ṭhin hi NKorea lam chuan na takin a lo sawisel fo tawh a, tun hnaiah pawh an demna thu hi an sawilang leh a ni. SKorea hian a ṭhenawm ram boruak ṭha zawk siam tumin hma a la mek a, hei vang hian Thawhṭanni khan Parliament chuan Development of Inter-Korean Relations Act chu a siamṭha a ni. He dan siamṭhatah hian ramri kaltlanga printed material, bungrua, pawisa leh thil hlu dang thawn khap vek a ni. Hei bakah hian ram pahnihte inrinaa loudspeaker hmanga thil an tihchhuahte pawh a khap tel bawk.
He khapna hi thla thum chhunga hman tur a ni a, dan bawhchhiate chu kum thum lung in tan emaw, won maktduai 30 (USD 27,000) chawi tir awm theih an ni.
Parliament-a Development of Inter-Korean Relations Act siamṭhatna ngaihtuahnaah hian eptu lamte chuan a tlang lohna turin an bei nasa hle a, mahse President Moon Jae-in kaihhruai rorellai party hian super-majority an neih avangin an dang zo lo a ni. President Moon hi NKorea nena an inkar siamṭha a, ramri boruak ṭha zawk siam duhtu a ni.
Kumin June thla khan NKorea hotu, Kim Jong-un farnu Kim Yo Jong chuan SKorea aṭanga an rama leaflet chhuah a ni ṭhin hi titawp tura phutin, hei hi an zawm lo a nih chuan ram pahnih inkar chu a chhe zual zel dawn tiin an lo vau tawh a ni. Hei bakah hian an ram aṭanga SKorea-a tlanchhe lut, leaflet thawnchhuahna telte chu mihring laktlak loh leh uicho mai tiin a sawi bawk.
He thu a sawi hnu hian SKorea President chuan Parliament-ah anti-leafleting law pharh a nih tur thu leh, leaflet chhuah ṭhin activist ṭhenkhatte chu thubuai siamsak an ni dawn tih a sawi ve nghal a ni.
Hetih lai hian SKorea activist leh NKorea aṭanga tlanchhe lut ṭhenkhatte chuan sorkar dan siam hi khin let an tum thu an sawi a, Human Rights Watch pawhin khapna siam hi SKorea-in Kim-a duhsakna dawn a duh vang mai niin a sawi bawk.