Israel-Hamas war : Netanyahu-a'n Hamas mi hren chhungte a hmu

Israel prime minister Benjamin Netanyahu chuan October 7-a Hamas firfiakte'n Israel an beih ṭuma an mi man, tun thlenga an la hren zui mek chhungte a hmu.

Netanyahu chuan Hamas mi hrente him taka chhanchhuah a, an in lama hruai haw an nih ngei theihna turin theihtawp an chhuah zel dawn tih a tiam.

Meeting neih hma hian Hostages and Missing Families Forum chuan Israel sipaite'n Gaza Strip-a beihpui an thlak mek karah, an chhungte dinhmun hi a ngaihtuahawm niin an sawi. Israel defence minister Yaov Galland pawhin mi tang chhungte hi hmuh a tum tih a sawi ve bawk.

Hamas-te hian mi 200 chuang an la hreng mek niin Israel lam chuan an sawi a, mahse, Hamas hian Israel sipaite beihpui thlaknaah an mi hren zinga 50 an thi tawh niin an sawi a, an la hren mek zat erawh an sawi lang lo. Firfiakte hian an mi hren zinga mi pali an chhuah tawh a, a bak chu Israel-in inkahhai a puan loh chuan an chhuah chhunzawm tawh dawn lo tih an sawi. Hemi hnu hian an mi hrente leh Israel ram jail hrang hranga Palestinian tang mekte inthlengpuiah an sawm leh a ni. Hamas-te'n an chhuah zinga mi, kum 85 mi Yocheved Lifschitz chuan Hamas-te'n an man hian lei hnuai lama lei verh aṭangin Gaza lamah an hruai tih a sawi.

Israel tank-te'n Gaza City khaw dai thleng tawh

Israel tank-te chuan nimin khan Gaza City khaw dai an thleng tawh. Israel hian khawmual lam aṭanga beihpui thlak a tum thu a sawi hnuah, Gaza City-a cheng civil mite chu chhim lama inthiarfihlim turin an hrilh zui reng a ni.

Israel sipaite chuan Hamas-te anti-tank position an kah chhiatsak tih an sawi a, Gaza coast leh Erez border crossing-ah firfiak eng emaw zat an kah hlum thu an sawi bawk.

Hetih lai hian Gaza lam aṭang pawhin ramri bula Israel chhim lam khuate chu rocket hmangin kah an ni ve reng bawk. Lebanon ram aṭang pawhin Hezbollah-te'n Israel hmar lam chu rocket hmangin an bei zui ve reng bawk a ni. Pathianni zan khan Gaza Strip chhim lama Hamas-te nen an inbeihnaah Israel sipai pahnihin hliam na tak an tuar a, damdawi inah dah nghal an ni tih Israel Defence Force (IDF) chuan an sawi.

Gaza-ah chhawmdawlna thawn luh belh

Pathianni khan Gaza Strip-a chhawmdawlna phurtu turck 30 chuang a luh belh leh, Israel-Hamas indona thlen hnua ṭum khata chhawmdawlna thawn luh tam ber ṭum a ni.

Gaza-a chhawmdawl hna thawktute chuan mipuite mamawh a la phuhru zo dawn lo hle tih an sawi. Mipuite hian ei tur leh mamawh dangte an tlak chham tawh avangin chhangphut dah khawmna hmun, warehouse-te luhchilhin an ru chhuak a ni.

International Criminal Court-a chief prosecutor Karim Khan chuan Gaza Strip tlawh pawh theihna awmchhun, Rafah crossing chu Pathianni khan a tlawh. Khan chuan Israel chu international law zawm turin a ngen a, hemi rual hian war crime ti-ah erawh a puh lo thung. October 7-a Hamas-te chet dan a dem thu leh, international humanitarian law bawhchhiatna lian tak a nih thu a sawi.

Israel-in Elon Musk a vau

Billionaire Elon Musk-a'n indona tuar mek, Gaza Strip tana communication link pek a tum thu a sawi hnuah, Israel chuan he thil hi kaltlangpui lo tura tiin, a theih dan angin a lo do let dawn tih a sawi.

Israel communication minister Shlomo Karhi chuan Musk-in inbiakpawhna tura a pek chuan, Hamas pawlte'n firfiaka an chetna thil atan an hmang ṭangkai thei dawn niin a sawi. "Hei ai chuan Musk hian Hamas-te'n an mi hren mek nausen, naupang, kum upa zawkte chhuah an nih theihna tur ngaihsak zawk rawh se," a ti.

Kar liam ta Zirtpawni khan Israel chuan Gaza Strip-a internet leh inbiakpawhna dangte a titawp a ni. Chhawmdawl hna thawktute chuan hei hian harsatna a belchhah hle tih sawiin, inbiakpawh theih loh a nih avangin hliam tuarte pui tura ambulance service pawh a bahlah phah a ni, an ti. Hei vang hian Inrinni khan Elon Musk chuan a aerospace company, SpaceX hnuaia satellite internet service, Starlink chu Gaza-a hman theih tura pek a tum thu a sawi a ni. He connection hi aid organisation-te puihna atana pek a tum tih a sawi. Mahse connection hi pek a nih chuan, aid organisation chauhin an hman theih a, Hamas-te hmang thei loa dan an nih theih dan tur erawh an sawi lo thung.