Kum 2020-ah Journalist man an tam

Committee to Protect Journalists (CPJ) chuan kuminah journalist man tawk an pung hle tih sawiin, December 1 thleng journalist jail-a khung hi 274 an awm tih a sawi. 

New York-based group CJP hian kum 1990 chho aṭang khan data hi a lakhawm ṭan a ni. Nikum chhung khan ram hrang hrangah journalist man hi 250 an awm a ni. 

Kumina journalist man an tamna chhan chu ram hrang hrangah nawrh huaihawt leh politics buaina a tam vang nia sawiin, heng thil thleng report-tu zinga tam tak chu man an ni a, China, Turkey, Egypt leh Saudi Arabia-ah kum dang aiin journalist man hi an tam niin a tarlang. 

Hei bakah hian ram ṭhenkhat chuan Covid-19 hripui leng chungchang report dante khuahkhirh tumin journalist-te an man bawk a, man tawk zingah hian journalist pahnih chu hri an kai avangin an thi a ni, a ti. 

Report-ah hian kumin chhung­in thu dik tawk lo, 'false news' thehdarha puh journalist 34 man an ni a, nikum khan 31 man an ni tih a tarlang. Journalist man zinga hmun thuma ṭhena hmun hnih chu firfiaka chetna leh dan pawna hnawhchhuah pawl nena inkaihhnawihna neia puh an ni a, hetihlai hian 20% dawn erawh chu eng ang thubuai nge siamsak an ni tih tarlan a ni lo thung.